Luikawr tihfai laiin septic tank lo sah thin

Save the Riparian te’n Tlawnga luang lut luikawr thenfai hna an thawk mek a, hetih lai hian an hnathawhna velah hian septic tank lo sah thin an awm!
May ni 1-ah khan luikawr thenfai hna, a thawh hnihna an tan a, a karah chawlh zeuh zeuh an neih avangin Zirtawpni (May ni 17) kha ni 10 an hnatlanna a ni. An hruaitute chuan tun kar Thawhlehni atang khan ni tinin septic tank sah hi an awm tih an sawi.
A thawh khatna ang bawkin a thawh hnihnaah pawh hnatlangte hian septic tank, luikawra luanluhtir an lo awm teuh tih hi an hmuchhuak a, a khur atanga kawra luhtir leh a khur pawh nei lova kawra luhtir an awm. An hnatlan laia sah hi an awm thin.
“Thawhlehni atanga Zirtawpni thleng khan sah hi an awm a, a rimchhe thei khawp mai,” an hruaitu pakhat chuan a ti a, Nilaini phei kha chuan an ban hma phah hial tih a sawi.
An hruaitute sawi danin, a thawh khatna ang bawkin a thawh hnihnaah hian naute diaper hman hnu a tam a, hmeichhe thla tin bi a chhuah changa an hman thin, hman hnu a tam bawk.
Cement ip chhia a tam a, satha ip chhia te, thawmhnaw chhia te, silpaulin chhia te a tam a, blanket chhia a awm nual bawk.
Ni 10 an thawk tawh na a, an thleng thui thei lo. Hei hi a hautak vang, bawlhhlawh a tam vang a ni a, ni 10 chhung hian metre 400 vel an la thleng chauh.
An sawi danin, ni khatah bawlhhlawh hi trip li vel an thiar khawm ziah a, mahse Nilaini atang kha chuan ni khatah trip 2 te an chharkhawm thei chauh tawh. Zirtawpni phei kha chuan trip khat chauh an chhar. Tun hnaiah a hautak zual tih an sawi a, tun kara an chetnaah hian bawlhhlawh hi leiah a lo tang nghet tawh a, thehfai a hautak hle tih an sawi.
May ni 14 atang khan NSS lamin an pui a, high school leh higher secondary school-a NSS te an hnatlang thin. Zirtawpni khan Govt Durtlang HSS NSS leh Govt Central HSS NSS ten an thawhpui a, NSS volunteer-te hi zirlai 120 vel leh zirtirtu 10 vel an tel.
Save the Riparian te hi an chau ve tan tih thu dawn a ni a, chawlh zeuh zeuh pawh an mamawh nia hriat a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More