Lung hrisel nan hunbi neia mut leh thawh

Lung hrisel nan hunbi neia mut leh thawh
Lung (heart) hrisel nan ei leh in leh exercise bakah mut that a pawimawh. US-a cardiologist Dr Sanjay Bhojraj chuan bloop pressure (BP) tha zawk kan neih theih nan mut that a pawimawh kan tih rualin, mut tam ringawt a ni lo va, mut hun leh thawh hun mumal tak neih a pawimawh niin a sawi a, mut hun leh thawh hun mumal tak kan neih chuan kan taksain chu chu a lo hrethiam a, a hnathawh dan a lo tha zawk a, chu chuan stress level a tihiam thei a, lung hriselna thlengin a titha thei. Hetihrual hian ei leh in leh exercise lak te pawh hlamchhiah tur a ni chuang lo va, tha takin an kalho zawk tur a ni. Tun tumah hian Dr Sanjay Bhojraj-a thukhawchang Times of India-a an tarlan kan rawn la chhawng e.
Kan taksa peng hrang hrang, lung pawh telin, te hian khuanu duan sa kalphung an nei a, chu chu circadian clock an ti mai thin. Zantin mut hun mumal tak neih a, zing thawh hun mumal tak neih bawk chuan he circadian clock hi a tanpui thin a, lung hah tur a tiziaawm thei a ni. Mut dan mumal lo, mut hun leh thawh hun nei lem lo te tan BP sang neih theihna risk pawh a sang zawk a ni.
Zana mut hunbi neih thlap a, zing thawh pawh a hun ngaiah chat tho leh thin teah chuan an stress hormone a lo tlahniam a, chu chuan BP a siamtha a, chu chu lung hriselna atan a pawimawh hle a ni. Mut tam ringawt a ni lo va, mut hun dar bi leh tawh hun dar bi mumal tak neih kha a pawimawh lai ber cu a ni.
Hetianga a hunbi thlap thlap a mut a, thawh leh thin hian hormone tha chi, cortisol leh melatonin te a siam chhuak tam a, chu chu stress tihniamtu, metabolism tichak tu, BP siamthatu niin, lung hriselna atan a pawimawh. Chutiang kan neih theih nan chuan mut hun dar mumal tak insiam tur a ni a, chu chu bawhpelh thin loh tur a ni. A tirah harsa ti deuh mah ila a lo rei deuh hnuah chuan kan taksain hrethiamin, kalphungah a nei ve tawh mai dawn a ni.