Lung in chhuahsan hnua coaching-a kirleh Becker

Vawithum ngawt Wimbledon champion lo ni tawh Boris Becker chu sum lamah a tlachhia (bankrupt) a, chutih laiin a ba rulhna tur a rohlu leh loan lak atangin pound maktaduai 2.5 hu a zep tih hriatchhuah a nih avangin lung lamahte hun a han hmang ren rawn a, nikum December thla khan UK lung in atangin chhuah a ni a, thawm a neih loh vang vang hnuah world number six Holger Rune coach nihna a chelh dawn tih tunhnai khan a puang.
Kum 55 mi German coach hian Denmark star Rune nena contract an ziah hma hian Novak Djokovic pawh kum 2013 atanga 2016 chhung khan a lo hrual tawh a, khatih chhung khan a enkawl Serb chuan Grand Slam singles title paruk ngawt a la hman nghe nghe.
Tuna a hrual chhoh leh tur Dane hi kum 20 mi chauh la ni mah se ATP huangah a mikhual tawh lo a, future Slam champion ti hiala sawi ni ve hman mah se kumin Wimbledon hnu lamah khan match khat chiah chak a la nei!
Kha SW19-ah khan Rune hian quarter-final thlengin, champion zui ta Carlos Alcaraz lakah straight sets-in a tlawm a, kha kha major tournament-a a thlensanber tum a la ni.
Becker chuan Rune-a coach a nih tur chungchang German Eurosport podcast-ah sawichhuakin, “Min han sawm ve khan inchhuanna min pe a, kan indawrna pawh a rei tawh a, tunah a hlawhtlinna kan hmu ta a, a hun dik tak ni pawhin a lang,” a ti.
Tarlan tawh angin, six-time Grand Slam winner Becker hi Insolvency Act an tih hnuaiah thubuai pali ngawta thiamloh chantir a nih avangin April 2022 khan kum hnih leh a chanve lung in tang turin jail lamah thawnluh a ni a, mahse, a tan hun tur tang tlingtla loin an ram Germany lamah thawnhaw a ni a, mahse, October 2024 hma chu UK-a a kir an phalsak dawn lo a, nakkum Wimbledon-ah court sir atangin Rune hi a kilkawi thei dawn lo!
Djokovic nen season thum an inhrawn tih loh chu Becker hian tennis inelna a chawlhsan hnuah a hun tam ber media tan pundit leh commentator ha a thawk a, a thawh tawhna zingah BBC pawh a tel.