Lung in tihchhiatnaah hmeichhe 100 chuang pawngsual leh hal an ni

Congolese khawpui, Goma-a mi tangten lung in tichhiaa an tlan chhuahnaah tang hmeichhia 100 chuang an pawngsual a, a nung chungin an hal bawk tih UN-in a sawi.
Kar hmasa Thawhtanni khan M23 helhovin khawpui an lak tan lai vel khan Munzenze lung ina tang za tel chuan lung in tichhiain an tlanchhuak.
Hetiang boruak karah hian tang mipate chuan hmeichhe tang ve 165 atanga 167 inkar vel chu nasa takin an sawisa a, an pawngsual bawk niin UN-in lehkha a siamah an tar lang.
UN lehkhaah hian heng hmeichhia zinga a tam zawk hi tlan chhuakte hian lung in an hal zuiah an thi niin an tar lang bawk.
Mi maktaduai khat aia tam chenna khawpui lian tak, Goma hi Rwanda-in a puih M23 helho hian DR Congo khawchhak lam an beihnaah an thunun.
M23 leh Congolese sipai leh an thawhpuite inbeihnaah hian mi 2,000 chuang an thi niin DR Congo sorkar chuan a sawi.
UN erawh chuan mi 900 vel thiin mi 3,000 dawn an inhliam niin a sawi thung a. UN leh DR Congo-in thi zat an sawi a inan loh chhan hi hriat a ni lo.