Lungawi lohna lantirnaah Serbia-a rorel lai party pisa hal

Lungawi lohna lantirnaah Serbia-a rorel lai party pisa hal
Serbia ram pumah sorkar duh lotu leh riot police chu zan nga chhung a zawnin an innawr ta a, mipui thinrim hian rorel lai, Serbian Progressive Party (SNS) pisate an hal.
Valjevo-ah chuan police hian stun grenade leh tear gas hmangin mi tam vak lo, hmai tuam chunga SNS hmun ruak haltute chu an bei let nia sawi a ni.
An khawpui, Belgrade leh Novi Sad-ah chuan tharum thawhna a thleng nasa nia sawi niin police pawh an che na hle. Interior ministry erawh chuan hetiang a thleng lo niin a sawi ve thung.
Lungawi lohna hi November thlaa Novi Sad-a rel station chim atanga intan niin Serbian-te chuan a hma thei ang bera inthlana kum 12 ro rel tawh, President Aleksander Vučić-a thuneihna tihtawp an duh.
Ei ruk duh lohna lantirna huaihawt a ni a, mi sang tam tak telin Nilaini thleng kha chuan muanawm takin thil a la kal a, sorkar lam tantuten an tih leh ve atangin tharum thawhna a thleng ta a ni.
Inrinni zan khan riot police chu Belgrade leh khawpui tam takah dah niin mipuiin inthlan hma an duhna an lantir ve bawk.
Lungawi lova pungkhawmte hian Vučić-a kaihhruai SNS party pisa leh flag an bitum bik a. An thawhpui, Serbian Radical Party hmunpuia an tukverhte an tihchhiatsak bawk.
Kar hmasa khan punkhawmnaa hliam tuar an awm thu sawi a ni a, social media-ah police-in Valjevo khawpuia mipa pakhat an sawisa lai a darh bawk.
Council of Europe hnuai Commissioner for Human Rights Michael O’Flaherty-a chuan Zirtawpni khan Serbia-a ‘police chet dan’ chu ngaihven a ngai tih sawiin thuneitute chu ‘phuba lak nana mi man leh boruak tang tak’ titawp turin a ngen.
Vučić-a chuan Inrinni khan Instagram-ah ‘tharum thawhnaa hi chak lohna puan chhuahna a ni’ tia tar langin ‘mi mawlte chu hrem’ a tiam.
Inthlan buatsaih hma pawh tum a nih loh thu sawiin an rama thil thleng mek chu ram dang atanga amah paih thlak tuma rawt chhuah niin a sawi bawk.
Russia chuan a thian tha, Vučić-a hi Serbia buainaah hian puih a tum thu a sawi bawk a. Foreign ministry chuan ‘kan unau Serbia-a thil thleng mek hi chhang lovin kan awm lo vang’ an ti a. Police pawhin dan angin thil an ti niin a sawi bawk.
Serbia-ah hian November-a Novi Sad railway station chung chima mi 16 an thih atang khan ni tin deuhthawh lungawi lohna lantir a ni.
He chhiatna hi Balkan ramah hian ei rukna nasa lantirna niah ngaiin langtlang taka chhui leh inthlan huaihawt hma phut a ni.