Zelensky-a’n indo titawp tura thil tikhirhah Russia puh

Zelensky-a’n indo titawp tura thil tikhirhah Russia puh
Volodymyr Zelensky-a chuan Russia-in inkahhai puan tumna a pawm duh tlat lo chuan indona titawp tura thil kalpui a tikhawlhkham vek tih a sawi.
“Russia hian vawi tam tak inkahhai puan tuma hmalakna a hnawl a, mi thahna a la tawp thei lo va. Hei hian thil a tihnawk vek a ni,” tiin Ukrainian president hian X-ah a tar lang.
Thawhtanni hian Zelensky-a hi Washington DC-ah kalin US President Donald Trump nen an inbe tawh a, Ukrainian hruaitu hi muanna tura rawtna pawm ngei turin a ti dawn.
Trump-a hian Zirtawpni (India-a Inrinni tuk)-a Russian President Vladimir Putin-a nena an inbiak hnuah inkahhai kal kâna muanna tluantling a awm zawkna tur lam hawi a duh tih a sawi.
Zirtawpnia inbiak hnua a tum a thlak chungchangah US president hian Truth Social-ah ‘indona rawng tak tihtawpna tur tha ber’ a ti a, inkahhai chu ‘engmah a ni lo’ tih a sawi bawk.
Putin-a nena an inbiak zawka phone-a Trump-a nen an inbiaknaah Zelensky-a hian muanna daih rei a duh thu a hrilh a, ‘inkah chawlhsan ngei’ leh mi thah tihtawp ngei a duh tih a hrilh bawk.
A hnuah Ukraine-in a phut chu ‘muanna daih rei leh rintlak’ bakah ‘himna tura intiamkamna’ a ni tih a sawi a, Moscow-in ‘an awp chin rama naupang an rukte kirtir’ tih a tel bawk.
Trump-a hian Zirtawpnia inbiak hma khan inkahhai chu ‘rang taka’ puan a duh tih a sawi a, Russia-in a pawm loh chuan hrekah a vau lawk.
Ukraine hian an phut lian ber chu inkahhai puan thuai a, a dawta hun rei zawk ni daih tura inbiak a tel a. Trump-a pawhin European hruaitute hnenah inbiaknaa a tum ber inkahhai a ni tih a hrilh lawk bawk nia sawi a ni.
Putin-a hian Trump-a hnenah hian muanna atan hian Ukraine chu Donbas-a Donetsk region atanga an inthiar chhuah leh Russia-in ramri hrula Zaporizhzhia leh Kherson neih let a tel tih a hrilh.
Russia hian Donbas hi Russian rama chinah an chhal a, Luhansk pum deuhthaw leh Dontsk 70% chuang an awp bawk a. Dan lovin kum 2014 atang khan Crimean peninsula an luahsak bawk.
Alaska-a inbiak zawha Fox News-in an kawmnaah Trump-a hian Ukrainian hruaitu laka thurawn a neih an zawtna chu, “Inremna siam,” tiin a chhang a. “Russia hi chak tak an ni a, anni chu an ni ve lo,” a ti.
Zirtawpnia inbiaknaah inremna siam a awm lo va, thil lian engmah sawi chhuah a ni lo.
Inrinni khan Putin-a chuan Trump-a nen an inbiak chu ‘a tangkai’ tih sawiin ‘kan tanhmun kan hrilh thei’ a ti bawk.
UN-a Russia first deputy permanent Dmitry Polyanskiy-a chuan Putin-a leh Zelensky-a an inhmu zui dawn em tih a sawi lo.
European hruaitute chuan Trump-Putin inbiaknaa American hruaituin inkahhai aia inremna awm lam a hawi ta chu an sawisel rih lo va. Pathianni chawhnu khan an inhmukhawm zui nghe nghe.
Thawhtannia White House-a Zelensky-a a kal tur hi February thlaa Trump-a leh Vice-President JD Vance nen an inbakkaih hnua hmaichhana an inbiak lehna hmasa ber tur a ni.