Lungdai an vanduai, an tla

May 22, Ningani khan LBS Suzuki 22nd Inter Branch YMA Football 2025 khelh chhunzawm a ni a, inelna neih meka chetha tluang tak Lungai chu Armed Veng South lakah an vanduai a, quarter-final lut zo lovin an tla. Lungdai an tlak lai hian Kawnpui Vengtharin quarter-final an lut ve thung.
Last l6 kalkawngah champion lai Venghnuai, vawi hnih champion tawh Ramhlun South, vawi khat chanpion tawh Kanan Veng te lo hneh tawhtu Lungdai hian RG Stadium-ah Armed Veng South an hmachhawn a, an chak leh teuh hle. Hun rei tak chhung si khat faia hma an hruai hnuin hun pek belh last minute-ah goal an chhuah a. Penalty shoot-out ah vanduai zawkah an tang zui leh a, uiawm takin an tla.
Inelna neih meka Killer Giant Lungdai hian minute 18-naa Lalhriathlua goal thun hmangin Armed Veng South lakah hma an hruai. An hmahruaina hi hun rei tak chhung an venghim a, penalty chawi bawk mah se an him zui thei tho a, an chak tlang mai a rinawm hman hle. Hun pangngaiah tawp hnu, hun pekbelh minute 10 thlengin Lungdai hian hma an la hruai a, hun pek belh minute 10 pelh hretah Armed Veng South an vannei ta nge nge a, Lundai an him reng thei ta lo. Aizawl chhuahlam veng tan hian Lalnunsanga chuan goal thunin an si phurh a sut a, vanneihthlak takin tlawm an pumpelh.
Hun pangngaiah chak zawk an awm theih loh vangin penalty shoot-out hmangin quarter-final lut tur chin fel a ni a. Vanneihthlak taka tlawm pumpelh Armed Veng South an vannei chhunzawm a, 4-2 a hnehna changin quarter-final an lut. Lungdai hian champion tawh team pathum ngawt paltlangin champion thei an nihzia lantir tawh mah se Armed Veng South lakah vanduaithlak takin an tlawm a, uiawm takin an YMA football a an zin kawng an zawh tawp ta rih.
Ningani hian RG Stadium-ah last 16 match hnih khelh a ni a, inkhel pakhat zawkah Kawnpui Vengthar chuan 3-1 in Tlangpui an hneh a, quarter-final an lut ve bawk.
Kawnpui Vengthar hian Tlangpui lakah an khel tha hle a, goal pawh an thun hma hle. Inkhel tan atanga minute 9-na lekah Lalengmawia chuan hmahruaina goal a thun a. Zohmingsanga chuan minute 18-naah an goal hnihna thunin an hmahruaina a tihzau belh leh zat bawk. Minute 18 chhungin si hnih phur hman mah se Tlangpui tan David Lalchhuansanga chuan minute 24-naah goal thunin an si phurh a sut then a, he goal hi inkhel tihmuhnawm leh zualtu a ni.
Tlangpuiin an si phurh sut tumin tan an khawh nasa hle a, Kawnpui Vengthar in goal thun belh tum bawk mah se hun pangngaiah goal lut a awm belh thei lo. Hun pek belh minute 90+1-ah Robert Lallawmzuala chuan Kawnpui Vengthar goal thumna thunin Tlangpui nen an inkar a tizau leh zual a. Tlangpuiin an si phurh sut a, quarter=final luh theih an beiseina mei chu a chhem mihsask zui ta a ni. Tlangpui hnehtu Kawnpui Vengthar hian College Veng an hmachhawn zui leh ang.
RG Stadium-ah last 16 khelh a nih lai hian 1st Bn MAP Ground-ah Last 32 khelh a ni ve thung a, inkhel pathum awmin, Leitan Ramthar, Chawnpui leh Durtlang ten hnehna changin last 16 an inhlangkai.
1st Bn MAP Ground-a inkhel hmasa berah Leitan Ramthar leh Lawipu te goal awm lovin an inhnehtawk a, penalty shoot-out ah Leitan Ramtharin 3-1 in hnehna an chang a, quarter-final an inhlangkai. Leitan Ramthar hian Bawngkawn an hmachhawn zui leh dawn a, fiahna hautak zawk an hmachhawn a ngai dawn.
Inkhel thawh hnihnaah Chawnpuiin Kulikawn chu 4-1 in an hneh a, quarter-final an lut ve bawk. Chawnpui tan hian Amosa Vanlalruata leh T. Vanneihtluanga ten goal hnih ve ve an thun a. Kulikawn tan K Malsawmtluanga’n goal thun bawk mah se result a tidanglam phak tawh lo. Kulikawn hnehtu Chawnpui hian quarter-final-ah Muthi hnehtu Durtlang an hmachhawn zui leh ang.
1st Bn MAP Ground-a inkhel hnuhnung berah Durtlang in an khingpui Muthi chu 4-1 in an hneh. Durtlang tan hian Lalliansanga chuan goal hnih a thun a, a che tha hle.