Lunglei bawlhhlawh sawngbawlna tur hmun siam mek LMC-in enfiah

Lunglei khawpui bawlhhlawh sawngbawlna hmun, Solid Waste Management Center (SWMC) sak mek chu Thawhlehni khan Lunglei Municipal Council vice chairman K Lalrinawma chuan a tlawh a, hnathawh dan a enfiah.
Lunglei leh Hauruang inkar Riangvaite Thlanmual bula awm SWMC hi cheng nuai 600 senga sak tur a ni a. Ruahman ang chuan SWMC-ah hian compose shed, land field, resource center, sanitary platform, site office cum chowkidar quarter, weighbridge leh fencing din a ni dawn a. A panna kawng pawh thawmthat tura tih niin, tunah hian hna engemawzat thawh tawh a ni a, UD&PA department enkawlna hnuaia thawh mek a ni.
LMC vice chairman chuan hnathawk mek chu tha thawhkhata a hriat thu leh hna kal zelah a nih dan tur anga taka thawh a beisei thu a sawi a. A enkawltu department pawhin ngun taka hnathawh vil tura ngenin, Lunglei khawpui tana rotling tur leh thianghlimnna kawnga hmasawnna pawimawh tak a nih avangin, tha taka hna kalpui tur leh a hun taka thawh zawh a nih theih nan department leh contractor-te bakah LMC tanho tul a tih thu a sawi a ni.
Solid Waste Management Center sak mek tlawhnaah hian LMC vice chairman hi LMC chief executive officer Donny Lalruatsanga bakah executive councillor pahnih – Zorinsanga Hmar leh Lalhruaitluangi Sailo, councillor Zonunmawii leh UD&PA DUDO C Sawihlira ten an tawiawm a ni.