Lunglei district-ah INC leh ZPM-in VC pakhat ve ve la

On Jan 30, 2025 8 0

Lunglei district-ah INC leh ZPM-in VC pakhat ve ve la
Inthlan hma hauhin Lunglei district-a khaw pahnihah chuan chuhtu awm loin village council sawkar a piang nghal a. Lunglei South bial Sailen khuaah Congress-in seat 2 leh ZPM-in seat khat la in, Thorang bial Sumasumi-ah seat thum awm chu ZPM-in chuhtu an nei lo bawk.
February 12-a Lunglei district-a village council 88 leh Lunglei Municipal huamchhunga local council 24-a inthlanpui buatsaih turah Nilaini khan Lunglei district election officer, bawrhsap Navneet Mann chuan thuthar thehdarhtute hnenah an hriat tur tul a hrilh a. DEO sawi danin, Lunglei district-a VC 88-a seat 344 (general seat 250 leh hmeichhe tan bika hauh seat 94) awmah chuh tuma hming pelut 1042 (general 771 leh reserved 271) an awm a. Endikna paltlang zo lo 2 (general leh reserved-ah 1 ve ve) awmin, inhnukdawk 18 (general 14 leh reserved 4) an awm. Heti hian inthlan chuhtu (contesting candidate) chu mi 1022 (general 756 leh reserved 266) an ni.
LMC huamchhunga LC 24-a seat 148 (general seat 110 leh reserved seat 38) awmah chuh tuma hming pelut 420 (general 312 leh reserved 108) an awm a. Endikna paltlang zo lo 2 (general ve ve) awmin, general seat-ah inhnukdawk 1 a awm a. Inthlan chuhtu chu mi 417 (general 309 leh reserved 108) an ni.
Lunglei district-ah hian a pumpuiah seat 492 (general seat 360 leh reserved seat 132) awmin, inthlan chuhtu 1439 (general 1065 leh reserved 374) an awm a. VC-ah vote nei mi 51731 (mipa 26596 leh hmeichhia 25135) awmin, LC-ah vote nei 41206 (mipa 19364 leh hmeichhia 21842) an awm. District pumah vote nei 92937 (mipa 45960 leh hmeichhia 46977) an awm a ni.
VC pahnihah chuhtu awmchhunte chuh buaitu awm loin tlinga puan (uncontested) an ni a. Seat 3 (general 2 leh reserved 1) awmna Sailenah chuan general seat pahniha ding INC candidate leh reserved seat-a ding ZPM mi chu tlinga puan an ni a. Seat 3 awmna tho Sumasumi-ah general seat 2 leh reserved seat 1 ah ZPM candidate-ten chuhpuitu an nei loa, tlinga puan an ni.
Heti hian VC 86 leh LC 24-ah inthlan vote thlak tur a ni dawn ta a ni.