Lunglei inthlang tur boruak a la dai
Kar lehah Lunglei Municipal Council (LMC) an inthlang dawn a, vawiin thlengin boruak a la dai tih thu dawn a ni.
Candidate puan tirh atangin Lunglei khawpuiah hian inthlan boruak a awm tak tak rih lo a, mahse tun hnai teah hian a kang ve ta deuh tih chu Lunglei-a cheng, tlawmngai pawla inhmangte sawi dan a ni.
“Lunglei chu a dai, Lunglei hi chu a mak khawp a. Tunah pawh a rawn phur hi chu Aizawl atanga rawn kal an ni deuh zel,” Lungleia tlawmngai pawl pakhata an hruaitu, a hming tarlan rem lo chuan a ti.
“Lunglei mi hi bikah hi chuan boruak hi a dai a, Aizawl atanga rawn pheite hi a ‘hot’ chu an ni,” a ti bawk.
Pawl hruaitu pakhat chuan politics ngaihvente chuan an ngaihven tho a, party mite pawh an tang a, mahse mipui mimir hi chuan titi-ah an la neih tak tak lo niin a sawi.
“Sawi tur dang a awm lo a, mipui pawhin titi-ah chuan an neih tho a. Mahse mipui titi ber a ni han tih tur chu a ni rih lo,” a ti a, “Party mite bawk hian titi-ah an neih a, anni hi chu an tang a,” a ti bawk.
Lunglei-a ni tin chhuak chanchinbu Vulmawi editor Lalrinpuia pawhin boruak a dai tih a sawi a, mahse tun hnaiah a kang ve hret hret nia a lan thu a sawi.
“Kan inthlang tur boruak hi a dai a, mahse vote thlak a hnai telh telh a, boruak chu a kang hret hret. Nilaini leh Ningani vel atang khan a kang niin a lang,” a ti.
A sawi dan chuan, political party-te pawhin tun hnaiah theihtawp an chhuah zual a, hei hian boruak a tikang a ni.
“Congress-in campaign office an hawng a, MNF leh ZMP-in street campaign te han han ti a, hei hian boruak a tikang a, a hma ai chuan kan boruak pawh a kang a,” a ti a, party mite chu a hma pawhin an tang reng tho a, mahse mipui nawlpuiah chuan tun hnaiah a kang tan chauh nia a ngaih thu a sawi.
“Party hrang hrangin theihtawp an chhuah a, mahse har an ti vek ang. Public meeting te pawh an han ti thin a, a kal tura ngaih chin kha an kal a ni mai a,” pawl hruaitu pakhat chuan a ti a, “Tunlaiah inkohkhawm te hi a har a, chung te pawh chu a ni ang,” a ti bawk.
Lunglei inthlang tur boruak a la dai
Get real time updates directly on you device, subscribe now.