Lunglei kawngpui cheina atanLMC-in Police hnenah sum pe

Lunglei kawngpui cheina atan
LMC-in Police hnenah sum pe
Lunglei Municipal Council (LMC) chuan Lunglei khawpui chhunga lirthei leh mipui chetvelna (traffic) him leh felfai zawk a awm theihnan kawngpui leh a vel cheina leh siamthatna atan kum 2024- 2025 a lirthei hun man (parking fee) an khawn chhuah atangin Rs. 5,41,075/ chu Lunglei District Police kutah Nilaini khan an hlan.
LMC chairman Lalzuithanga chuan Lunglei district superintendent of Police J Lalmuankima kutah a hlan a. LMC chairman chuan lirthei chetvelna kaihhnawiha ruahmanna siam turin LMC hnuaiah Traffic & Transport Coordination Committee (TTCC) din a ni a. A taka hma latu, LMC leh TTCC kutke ber leh an rin chhan ber chu SP leh Traffic Police an ni, tiin, an tawiawmna leh thawhpuinaah lawmthu a sawi a ni.
Lunglei SP pawhin District Police-in kawngpui leh a vel cheina atana an ruahmanna a hlawhtlin theihnan LMC-in sum mamawh an pek avangin lawmthu a sawi a. Lunglei chu traffic kaihhnawiha chei rem tak a ni, tiin, lirthei leh mipui veivak tana him, tlan leh hmuh nuam taka chei chhoh zel an tum tih a sawi. Lirthei hun dan leh tlan danah, kawngpuia dan leh hrai zawm chungchangah pawh khauh zawka hma lak zel an tum tih a sawi bawk.
LMC-in 2024- 2025 chhunga parking fee a hmuh Rs. 18,31,349 chu Board of Councillors chuan traffic kaihhnawih tihchangtlunna atan hman turin a rel a, hemi atang hian kawngpui chhinchhiahna (marking) siamnan Rs. 4,86,275 hman a ni tawh. Sum bang la awm atangin tun tumah hian kawnglai cheina leh tilang fiahtu eng (reflector /road stud light) vuahna atan, kawng kual laia darthalang (convex mirror) dahna atan, chhinchhiahna hrang hrang siamna atan leh tiang eng thei (light stick), kawng danna – barricade, tape, cone, sign post etc lirthei ke chehna (wheel clamp) leh hmanraw mamawh dang leina atan Rs. 5,41,075 chu District Police kutah hlan a ni.