Thla khat hnuah raltlan pung leh hret
Myanmar atanga Mizorama raltlan zat a pung leh hret a; a hma angin a hlawmin Mizoramah lut tawh lo mah se lut thar an la awm zel avangin an pung leh hret.
Home department-in an chhinchhiah danin, April ni 2-a Mizorama Myanmar atanga raltlan awm mek zat chu 31807 an ni a, March ni 4 khan mi 31718 an ni.
A hma ang bawkin raltlan hi Champhai District-ah an tam ber a, mi 10226 an awm. Lawngtlai District-ah mi 5750 an awm a, Aizawl District-ah mi 3341 an awm. Saitual District-ah mi 104 an awm a, Khawzawl District-ah mi 190 an awm.
Mizorama raltlan awm mek zat mi 31807 zinga mi 31718 te chu ID card pea chhinchhiah fel an ni tawh.
Raltlanah hian mi 1257-in Covid-19 hri an kai tawh a, mi parukin nunna an chan tawh. Mi 10716-in hri danna dose khatna an la tawh a, mi 5270-in dose hnihna an la tawh.
Thu dawn danin, raltlanah hian a him deuhva mahni khaw lama kir thin mi engemaw zat an awm a, engemaw zat chuan Mizoram leh mahni khaw lam an kartawn thin. Hei vang hian chhinchhiah fel fai an har a, Mizoram chhungah pawh awmna sawn an awm thin avangin district hrang hranga awm zat hi chhinchhiah a har.
A tir lam angin a hlawm liana rawn lut an ni tawh lo a, mahse tlem te tea rawn kal thar chu an la awm deuh reng tih thu dawn a ni.
-- Advertisement --
Raltlan awm mek zat
Aizawl 3341
Champhai 10226
Hnahthial 1110
Khawzawl 190
Kolasib 222
Lawngtlai 5750
Lunglei 2134
Mamit 349
Saitual 104
Serchhip 509
Siaha 7872