Record siamin Billboard Hot 100-ah Jimin a No.1

Record siamin Billboard Hot 100-ah Jimin a No.1
Jimin hla thar ‘Like Crazy’ chu kar khat chhunga US-a hla lar ber niin, Billboard Hot 100 (singles) chart No.1-ah a debut a, K-pop group member Jimin hi South Korean solo artist zingah he chart-a No.1 ni thei hmasa ber a ni.
Billboard Hot 100 chart hi kar khat chhunga US-a hla lar dan tehna niin chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Jimin ‘Like Crazy’ hi hralh a kal hle a, version chi nga a awm nghe nghe a ni. He hla hi March ni 24-a tlangzarh niin, Jimin solo album hmasa ber ‘FACE’ atanga a single niin, he album pawh hi Billboard 200 (albums) chart No.2-ah a debut bawk e.
‘Like Crazy’ hi kar khat chhungin 2,54,000 an hralh hman a, hei hi download leh CD sales niin, streaming-ah pawh maktaduai 10 keiin, radio airplay-ah a hniam deuh thung a, 64,000 ngaithlatu nei angin an chhut. A hla original version hi Korean leh a English version hi March ni 24-ah tlangzarh niin, ‘Deep House’ leh ‘UK Garage’ mix leh instrumental version te pawh March ni 26-ah a tichhuak lehnghal a, a vai hian BTS webstore leh dawrah te cent 69-a zawrh chhuah niin, a CD single hi BTS webstore-ah dollar 1.99-in an zuar chhuak tawh. A version zawng zawng hi chart ranking siam nan lak vek a ni.
Jimin hi BTS angin Hot 100 chart No.1-ah vawi ruk (6) a lang tawh bawk a, an hla ‘Permission To Dance’ (July 2021), ‘Butter’ (JUne 2021),’Life Goes On’ (December 2020), leh ‘Dynamite’ (September 2020) bakah Coldplay an zaipuina ‘My Universe’ (October 2021) leh Jawsh 685 leh Jason Derulo an zaipuina ‘Savage Love (Laxed – Siren Beat)’ (October 2020) te chu No.1 kai tawhin, tunah ama pualin ‘Like Crazy’ a No.1 pui leh ta a ni.
Jimin hian record dang pawh a siam a, group anga Hot 100 chart-a No.1 nei tawh, solo anga hla tihchhuah hmasak ber he chart-a No.1 kaipui nghal chat thei hmasa ber a ni bawk. Jimin hi South Korean artist zinga he chart-a solo anga No.1 ni thei hmasa ber a ni bawk.
Chart No.1 hlui Miley Cyrus ‘Flowers’ chu streaming maktaduai 22.9, sales 10,000 leh radio airplay-ah ngaithlatu maktaduai 106.9 nei lehin No.1 atangin No.2-ah a tawlh a, he hla hi chart-ah a zawn ni kher lovin kar riat a No.1 tawh a ni.
Chart No.1 hlui Morgan Wallen ‘Last Night’ chu No.2 atangin No.3-ah a tawlh a, SZA ‘Kill Bill’ chu No.3 atangin No.4-ah a tawlh a, Metro Boomin, The Weeknd leh 21 Savage ‘Creepin’ chu No.4 atangin No.5-ah a tawlh a, chart No.1 hlui The Weeknd leh Ariana Grande ‘Die for You’ chu No.5 atangin No.6-ah a tawlh a, PinkPantheress leh Ice Spice ‘Boy’s a Liar, Pt. 2’ chu No.6 atangin No.7-ah a tawlh ta bawk.
Rema leh Selena Gomez ‘Calm Down’ chu No.8-ah bawk la awmin, chart No.1 hlui Taylor Swift ‘Anti-Hero’ chu No.7 atangin No.9-ah a tawlh a, Coi Leray ‘Players’ chu No.9 atangin No.10-ah a tawlh ve ta bawk.