Lunglei tlawhtu larsap hnenah thlen

Lunglei tlawhtu larsap hnenah thlen
Larsap Dr Hari Babu Kambhampati chuan Nilaini khan Lunglei a tlawh a. Sawrkar hotute bakah mi hrang hrang a kawm a. An thil vei zawng leh district hmasawnna tura tul an tih te an lo thlen.
Larsap hian Lunglei district head of office-te, bank manager-te leh VC Association hruaitute a kawm hmasa a. District bawrhsap Ramdinliani’n district chanchin, dinhmun leh sawrkar department hrang hrang hnuaia scheme leh project kalpui mekte a sawifiah. 2nd Bn MAP commandant Saidingliana chuan an district-a dan leh thupek kenkawh chungchang leh venhimna kalpui dan a sawifiah ve bawk. Head of office thenkhatten an department hmalakna pawimawh leh harsatna neihte an lo thlen a ni.
Hemi hnu hian kohhran hruaitute, NGO hruaitute, PMMY beneficiary-te, LMC councillor-te leh political party-te a kawm leh a. An thil vei zawng leh hmasawn zelna tura hma lak tul an tih – Manipur buaina chungchang, Lunglei district tui harsatna, MZU Southern Campus din chungchang, Lunglei district atanga Indo-Bangladesh Border Trade kalpui, Regional Transport Authority din, Greater Lunglei Water Supply tih puitlin, Vocational Training Centre dinte ziakin an thlen.
Larsap chuan sawrkarin mipui tana scheme tha tak tak a siamte a nih tur anga tangkai taka hman an nih theihna’n department-te chuan mipui pan hmasak nghak loa, a tul apianga pen chhuaka mipui zirtir nasat a tul tih a sawi a. Mizoram hmun hrang hranga district mipui tam zawkin sawrkar laipui scheme tha tak tak, cheng tlemte kum khat atana pek a, cheng nuai tel hmuh theihna tur te an hre lo hle tih a hmuh thu leh hengah hian zirtirna kalpui nasat a tul tih a sawi.
District tihmasawn zel turin bank-ten mawhphurna pawimawh tak an nei, tiin, sawrkar laipui scheme hrang hrang mipui tam zawkin an hman tangkai theihna’n theihtawp chhuah turin a chah.
Sawrkar laipui ruahmannaa Lunglei district-a school tha tak tak din – Jawahar Navodaya Vidyalaya, Eklavya Model Residential Schools leh Kendriya Vidyalaya ah te enrolment a tha tawk lo tih sawiin, a bikin thingtlang khua atanga zirlai tam zawk an luh theihna’n inhrilhhriat a tul tih a sawi a ni.
Lunglei district-a inbiakpawhna leh internet connectivity tha zawk a awm theihna’n 4G saturation project leh BharatNet Project kalpui mekah chak taka hma la chhunzawm zel tur leh harsatna an neih chuan a hnena thlen hreh lo turin a chah a. Mizo zingah thalai lehkhathiam hna hmulo tam tak an tam thu leh an tan theihtawpa hma lak a tul thu a sawi.
Thutkhawma report danin, tunah hian Lunglei district sq.km 4056.58 a zauah mi 135315 vel an cheng a. Village Council 113 a awm a, Civil Sub Division 2, RD Block 4, Assembly Constituency 6 a awm. Lunglei DEF hnuaiah Police Station pali awmin, Armed Police pakhat – 2nd Bn MAP a awm a, dan leh thupek kenkawh kawngah harsatna liantham awm loin kumin January 1 atanga May 10 thleng khan Lunglei district-ah case 97 ziahluh tawh niin 36 chargesheet tawh a ni.
Larsap hian 20 Bn BSF Headquarter tlawhin, mi harsa in sak tanpuina scheme PMAY (U) beneficiary pahnih a hmunah a tlawh bawk. Nizan Lungleiah a riak a, vawiin hian Hnahthial district a tlawh ang.