Lungleia hmasawnna hna thawh ho UD&PA minister-in a enfiah

Urban Development & Poverty Alleviation minister K Sapdanga chuan Zirtawpni khan Lunglei khawpui chhunga UD&PA hnuaia hmalakna hrang hrang tlawhin, a dinhmun leh hma lak chhunzawm dan tur a enfiah.
UD&PA minister-in a tlawh Solid Waste Management Centre-II Pukpui chu Swachh Bharat Mission (Urban) 2.0 leh ringfenced fund atanga thawh niin, cheng nuai 698.01 senna tur a ni a. A hna civil work hi LHM Infra Khatla Aizawl-in thawkin, 2024 October 6 khan an tan a, kumin October-ah zawh theih beisei a ni. A panna kawng laih zawh tawh niin, PCC pavement-a siam mek a ni.
A hranga bawlhhlawh tawih thei sawngbawlna tur leh tawih thei lo sawngbawlna tur building leh site office building sak mek niin, tunah hna zaa 70 vel zawh a ni tawh a. Civil work bakah bawlhhlawh sawngbawlna atana khawl leh hmanraw mamawh ngaihtuah mek a ni.
Lunglei khawpuiin bawlhhlawh sawngbawlna hmun tha tak pahnih a nei thuai dawn tih minister hian sawiin, tangkai leh hlawhtling taka hman a nih theihnan tun atangin mipuiin inchhung khura bawlhhlawh thliar hran lo zir lawk a pawimawh tih a sawi.
Lungleia 3R (Reduce, Reuse, Recycle) Centre hmasa ber, Chanmar – mi chu Bana Kaih Scheme hnuaia Mizoram District Transformation Programme, SBM-Urban 2.0 leh DAY-NULM hma laknaa kumin June 5-a hawn, UD&PA enkawl a ni a. Sub-Hqrs MHIP Lunglei nen tangtlangin khawpui chhunga MHIP branch-ten bungrua, thawmhnaw leh lehkhabu hlui an khawn khawm chu a mamawh apiangin an lak theih turin 3R Centre-ah hian dah a ni. Self help group-ten thil chhia atanga thil tangkai zawk an siam an pho chhuak bawk.
Bungrua hi lirthei laihawl phur 10 chuang dawn a ni tawh a, hawn a nih atangin pisa kai niah mamawh laa pantu nitin chawh rualin mi 150 vel zel an awm anga chhinchhiah a ni.
3R Centre chu hnawk leh bawlhhlawh chang mai turte a mamawh zawk mi tam takin an lo hman tangkai tura dah khawmna a nih angin, bawlhhlawh titlemtu, hman nawn theih hman nawn leh thil tangkai zawka siamna, faina leh thianghlimna leh inrenchemna atana hmalakna pawimawh tak a ni tih K Sapdanga hian a sawi a. Lungleia 3R Centre kalpui dan chu tha a tih sawiin, Centre hlawhtlinna atana UD&PA-a thawktute, MHIP, SHG leh bungraw thawhtute inpeknaah lawmthu a sawi a ni.
C Thuamluaia Mual bula multi- level car parking tur, state priority project (SPP) hnuaia cheng nuai 300 senga sak mek pawh a tlawh a. A sak hna hi Brilliant Consultancy Chaltlang Aizawl-in a thawk. Kumin March 24 khan hna tanin, 2028 February 28-a zawh tur a ni. Lirthei dahna tur hi chhawng thum ruahman a ni. Hna pumpui atangin zaa 20 vel thawh a ni tawh.
Lunglei Park cheithat hna Urban Infrastructure Development Fund hnuaiah cheng nuai 200 senga thawh tur niin, thawk tur hian A3 Design Build Zonuam Aizawl thlan an ni a. Kumin June chhunga hna tan hman beisei niin, thla 18 chhunga zawh tur a ni. Contractor-te chu hna tan thuai tum tur leh a tha thei ang leh chak thei ang bera thawh zawh tum turin a chah.
Circuit House penga Pocket Park siamna tur ruahman, SPP hnuaia cheng nuai 500 senga Saikuti Hall cheithat tum leh Lunglei Pulse hnuaia cheng nuai 1262 senga khawpui cheimawina tur, hmasawnna ruhrel hrang hrang dinna tur ruahmanna pawh chak taka bawhzui zel a nih a beisei tih UD&PA minister hian sawiin, Lunglei khawpui hmel lanna leh mipui tana tangkai tur a nih angin mawhphurtute chu theihtawp chhuah a, tha taka kalpui turin a chah.