Lungleia hospital & clinic ho dan zawm ngai zawm dan sawiho

Lungleia hospital & clinic ho dan zawm ngai zawm dan sawiho
Lunglei district-a hriselna dinhmun enfiah leh inentirna (clinical establishment -CE) dan anga chhinchhiah leh khuahkhirh tura din, District Registering Authority (DRA) chu an chairperson, additional DC Rochuangkimi Khenglawt kaihhruaiin Thawhtanni khan an thukhawm a. A kaihhnawih sawrkar department aiawhte an tel.
Sawrkar laipui dan siam – The Clinical Establishments (Registration and Regulation) Act 2010 behchhanin Mizorama clinical establishment-te chhinchhiah, khuahkhirh leh vil zuina tur – The Mizoram Clinical Establishments (Registration and Regulation) Rules 2014 hman a ni a. He dan hnuaiah hian damdawi in, clinic leh laboratory chu DRA-ah an inziahluh a, a him chin leh pawm theih chin an phak ngei ngei a tul a ni. Chutiang tur chuan Lunglei district-ah pawh hma lak a ni.
District Senior CMO Office chhinchhiah danin, tun dinhmunah Lunglei district-ah sawrkar hriatpui clinical establishment 59 a awm a. Heng zinga 15 chu sawrkar enkawl (District Hospital, Community Health Centre leh Primary Health Centre) niin, a dang 44 chu mimal din (private) damdawi in, clinic leh laboratory a ni. Hospital 19, clinic 21, dental clinic 12, physiotherapy clinic 2 leh diagnostic laboratory & imaging centre 5 a awm.
Thutkhawmah hian DRA thutkhawm hmasaa thu dah bawhzui a nih dan leh 2025 December 3–5 chhunga Lungleia non-governmental clinical establishment endik dan thlirho a ni a, hma lak zui dan tur sawi a ni. Damdawi in thli leh bawlhhlawh sawngbawl leh thehthang chungchangah him leh felfai zawka thehthang a nih theihnan clinical establishment-ten Mizoram Pollution Control Board atanga phalna an neih a ngaih angin authorisation dil mek leh la nei lo chu authorisation nei thuai tum tura hriattir nise, tih a ni a. Thehthang leh sawngbawl chungchanga an hriat tur inzirtirna buatsaih dan ngaihtuah nise, an ti bawk.