Lungleia malaria tihrem dan tur ngaihtuah khawm

District Task Force Committee for Elimination of Malaria Lunglei chu an chairman, bawrhsap Ramdinliani kaihhruaiin an thukhawm a. Lunglei District Vector Borne Disease Control Programme team-in power point presentation hmangin an district-a malaria hrik tirem tura hma an lak tawhna leh hmachhawp bakah an harsatna tawh leh a sutkian dan tura ruahmanna an siam an sawifiah a ni.
LDVBDCP report danin, an hmalakna hian thingtlang khaw 193 a tuam a. Nikum chhung khan Lunglei district-ah mi 51058 thisen an endik atangin, malaria hrik pai 4959 (Pf 3673 leh Pv 1286) hmuhchhuah an ni a, heng zinga 3-in nunna an chan.
Kum 2022 chhung khan malaria hrik pai mi 2890 an awm a, kum 2023 chhung khan a let deuhthawhin an pung. Malaria pai zingah hian Lunglei district khawthlang lam leh NHIDCL hnuaia NH54 leh NH302 kawng sial hna thawk an tam a ni. Lunglei district-ah nikum chhung khan Chikungunya hrik pai mi 43 leh Dengue kai 179 an hmuchhuak bawk.
Lunglei district-ah hian fur laia lirthei thlen theih lohna, lawng chauha kalpawh theih thingtlang khaw 30 vel a awm a. District bawrhsap hmalaknain Disaster Management & Rehabilitation department hnuai atangin mi 12 chuan theina lawng siamtir a ni a. A tulna piangah Health department pawhin an hmang thei dawn a ni.