Lungleiah felfai taka lirthei tlan dan siam tumin hma la

Lunglei Traffic & Transport Coordination Committee (TTCC) chuan Lungleia lirthei tlan dan felfai, mipui tana him leh zangkhai zawka kalpui dan a ruahman mek.
TTCC kaihruaitu Lunglei Municipal Council (LMC) vice chairman K Lalrinawma chuan Lunglei khawpuiah lirthei tlan dan leh hun dan chungchangah mipui tana him leh zangkhai mai piahlamah, khawpui hmel timawi tur zawnga ruahmanna fel tak a awm theih nan hma an la tih a sawi a. Khawpui faina leh thianghlimna atana bawlhhlawh paih leh sawngbawl chungchang pawh ruahman mek a ni, tiin, mipui tana thil tha zawk a awm theih nana insingsak hun lai a nih avangin an hmalakna leh ruahmanna ngaichang a, tha taka thlawp turin Lunglei mipui a ngen tih a sawi.
TTCC thukhawm chuan two wheeler taxi, auto rickshaw leh maxi cab stand ruahmannaa dilna leh rawtna lut, office atana parking siamsak tura ngenna, pik up stand ruahman dan tur leh khawpui chhunga lirthei lian tlan luh hunbi ruahman kaihhnawiha dilna lut an thlir ho a. Sawifel nghal theih chin rel niin, a hmuna en hmasak ngai chi chu LMC leh Traffic Police nen enfiah hnua ruahmanna siam nise, an ti.
Thutkhawmah hian Lunglei District Transport Office-in kum kaltaa khawpui chhunga parking fee khawn tur tender an chhuah chhanna atanga sum lut Rs. 2,30,000 chu LMC-a an chhunluh thu leh hemi atang hian Lunglei khawpui traffic enkawl nan Traffic Police kutah cheng nuai 1 hlan chhawn a nih thu sawi a ni bawk.