Lungleiah hna zawngtu leh ruaitute indawr tawn theihna tur hmun siam

Labour, Employment, Skill Development & Entrepreneurship (LESDE) department Lunglei leh Govt J Buana College tangdun huaihawtin Thawhlehni khan Govt J. Buana College campus-ah hna zawngtute leh hnathawk ruaitute intawhkhawm kutpui, “LESDE Job Fair & Career Fair 2026” buatsaih a ni. Fair hi sawrkar laipui Ministry of Labour and Employment hnuaia National Career Service Project kaltlanga Model Career Centre Scheme atanga buatsaih a ni.
Job Fair hawngtu Lunglei bawrhsap Navneet Mann chuan, mahni intodelh a, chhungkua leh khawtlang tana mi tangkai ni turin eizawnna ngelnghet neih a pawimawh tih a sawi a. Sawrkar hna chu hna nghet leh him ni mah se, tunlai khawvelah eizawnna kawng awmchhun a ni tawh loa, sawrkar hna chauh thlir loin, sumdawnna leh mahni thiamthil hmanga eizawnna remchang awm chhawr tangkai turin a chah.
Entrepreneurship, internet leh social media hmanga sumdawnna (e-commerce) leh private sector-a hna hrang hrang chu eizawnna tlak a ni tih sawiin, Mizoramah pawh tualchhung sumdawng hlawhtling, self-help group leh ei tur sawngbawlna tha leh entawn tlak tak tak an awm thu a sawi a. Zirlaite’n college an kal chhungin lehkha zirna tluang pangngai bakah, vocational training leh thiamna (skill) dangte pawh ngai pawimawh a, mahni hmasawnna tura theihna hrang hrang an neihte chher hriam turin a chah.
LESDE Job Fair-ah hian hnathawk ruaitu pawl/ sumdawng hrang hrang telin, stall 27 siam a ni a. Heng sector – financial institution, banking, healthcare, service, automobile, IT, FMCE, tourism & sospitality, beauty & wellness, etc. hnuaia company hrang hrang inpho chhuakin, Mizo thalai hna zawng lai tan hnathawh tur an chhawp chhuak a. Thalai hna hmu nghal an awm bakah employer-te hnena inziaklut, interview leh document endik hmabak thahnem tak an awm a. Zirna leh eizawnna kawng inkawhhmuhna (career guidance leh counselling) buatsaih nghalin, zirlai leh hna zawng lai thahnem takin an pan bawk.
Lunglei DLEO Lalbiakmuana Hauhnar sawi danin, Job Fair buatsaih chhan ber chu, thalai hna zawng mek leh hnathawk ruaitute awlsam zawka an indawr tawn theihna tur a ni a, thalai hna zawng mek leh zirlaite tana kawng kawhhmuh turin career guidance leh counselling buatsaih tel a ni tih a sawi.