LUNGLEIAH MIZORAM STATE UNIVERSITY AWM TA SE

P.C.Lawmkunga

Chunglam thupek avangin Mizoram Sawrkar pawhin mahni pual ngei University din tumin hma a la mek a. Hna hautak zet mai a nih avangin, “A then pawh” mipuiin kan hriat ve hma khan thuneitute chu an lo thaw kaih kaih tawh a. National Education Policy 2020 chuan kum 2030 atang chuan Mizorama College te hi (PUC tih loh chu) MZU an zawm reng a khap tawh dawn avanga hetianga State University hi neih tul a lo ni chhap a. Chutiang taka thupek khauh awm ta lo se, Mizoram sawrkar hian mahni puala University neih chu a la suangtuah phak lo hial mai thei a ni. Hmun leh hma, sum leh pai leh thawktu tur a hautak tiah tiah leh dawn em mai a, thil huphurhawm tak a ni pawh hi a awm hliah hliah mai. Chutih lai erawh chuan tun hma atangin kan thenawm State tam takten mahni pual University an lo nei fir fer tawh tih han hmuh hian NEP 2000 hi remchanga laa State University chu-a harsa emaw harsa lo emaw- kan neih ve ngei a tul ta a ni ber mai.
A hmun turah ngaihdan a inang chiah lo: Mizoram State University Act 2025 Section 3(5) ah chuan State University hmunpui tur chu Aizawl a ni ang, tiin a dah thlap mai a. Helai bung leh chang behchhan hian hma lak chhoh zel ni te pawhin a lang a. Harsatna dangdai tak engmah la awmin a lang lo. Mipui chuan Aizawla University pahnihna nei turin kan lo suangtuah vek tawh pawhin a rinawm. Chutih lai chuan Lunglei mipui leh rorel lai party MLA te atangin Mizoram State University chu Lungleia dah ngei ni se, tia nawrna a lo awm ve mek a. He nawrna hi rin aiin Sawrkar bengah a lo ri ring a ni chek ang chu CM ber chuan November 20, 2025-a Lungleia High Powered Committee inkhawmnaah chuan State University chu Lungleia dah a ni ang, tiin HPC hotuten a hmun hma an zawn nghal tur thu a puang ta dup dup mai a. He thupuan hi Chhim lam mipuiin an “Hip, Hip, Hurray” dual dual laiin Hmar lamah chuan a tla na tehchiam lo va. Mi thiam thenkhat phei chuan Lungleia State University dah a remchan loh dan pawh ziak leh TV-a sawihona thlengin an nei chho ta hial a. Mahse, Pu berin “A awm ang” a tih si chuan awm turah i lo ngai phawt teh ang. Hun erawh a la duh rei viau mai thei.
Lungleiah dah ni ta se: Lungleia State University dah a remchan loh dan chu a chunga kan sawi ang khian kan hre hnem tawh viau va. An tan chhan pawh han phehthlak tur a vang viau mai thei awm e. College clustering system leh thawktu lak pawh awlsam zawk dawna sawi te hi hnial rual lohva thil dik a ni ngei ang. Mahse Sawrkar berin Lunglei lam a awn tak avangin harsa zawk deuh pawha State University hi Lunglei lama din chu a ngai dawn a ni ta phawt mai a. Chutianga thil a lo awm tak si avang chuan Lungleia zirna in sang ber State University dah a tulna hi sawi lan ve a tul ta deuh tlat mai a.
Chhim lam hi Mizoram kawtchhuah tur a la ni thei: Zawlnei puansak kan ngai lo. Mizoram Chhim lam hi Hmar lam aia sumdawnna leh zin veivahnaah pawh la lun tur a ni tih chu mit ngeiin kan hmu thei a. Tunah hian Kolodyne Multi-Modal Transit Transport Project, kawngpui tha tak mai hi sial zawh a ni deuh thaw tawh a. Hei hian Zorinpui atangin Myanmar-a Sittwe lawngchawlhna a pawh dawn avangin Kolkata atanga Mizoram 1850 km ni thin kha 930 a lo ni tawh ang a, 920km zetin a pawt hnai dawn a. Sumdawng leh zin mite tan a tangkai hle dawn a. Silchar kawng chhe reng mai pawh hi mumang ram a lo ni tawh ang. Chutiang a lo nih chuan Lunglei leh Lawngtlai te chu khawpui pawimawh, “Lian tual tual” tur an ni sa ngawt mai a ni. Chutih laia Lungleia University a lo awm ut mai chu khualzin leh sumdawngte hiptu a ni dawn a ni.
Thlang lamah lah Bangladesh nena kan insumdawn tawnna tur Kawrpuichhuah (Tlabung bul) leh Silsury ah te land custom station pawh din tum mek niin a lang bawk a. Heng thilte hi tihpuitlin tak tak a nih chuan “Hmana an duh loh kha, aw ropuiin leng tawh ang che” tih te hi min la sak khum lo vang tih pawh a sawi theih ta lo.
Tourism a tihmasawn ang: Hetianga Chhim lam a lo than zel dawn chuan zin vei vak mi an lo lut tam hle bawk ang. Myanmar, Bangladesh mai bakah India ram atang pawhin tlawhtu an nei zut zut ngei ang. Hotel leh homestay lam ti mite tan eizawnna tha tak a lo ni bawk ang.
Chutiang a lo nih hun chuan kan State University chu khualzinte hiptute zinga pawimawh ber pakhat a lo ni ang a. Zirlai tam tak, India ram atang chauh ni lovin India ram pawn atangin tam tak an lo lut hum hum ngei ang.
A hmun hma thu-ah harsatna awm lo vang: University Campus tur hi Aizawl lam aiin Lunglei lamah hian hmun remchang a tam zawk mai thei. Sawrkar berin thu a tihtluk tawh te chuan thil theih lovah kan ngai tur a ni lo vang. Mahse sawi tawh angin harsatna (challenge-chona a ni fo lem lo) tam tak chu sut tlang tur a awm ngei ang. Chu pawh ni se, Sawrkar puitling ve riang ruang chuan su tlang thei zel turah kan ngai phawt tur a ni ang.
Chhim lam ta tur a ni bik lo: He University hi Mizo mipuite ta tur a ni. Chhim lama a awm avanga Chhim lam mite ta tur, Hmar lam atanga inla hrang tur a ni hauh lo. Chuvang chuan Schools of Studies atana College clustering pawh hi Chhim lam college-in a daih loh chuan Hmar lama College te pawh hman tel mai a theih dawn lawm ni? Regional feeling kan tih fo hi a awm a nih hlauh chuan khawi lamah zawk awm tak ang maw?
Harsatna chhuanlama Sawrkar hian a thu a sut leh a nih vaih erawh chuan Mizoram Sawrkar hming hi a thang mawi lo hle ang a, Chhim lam phei chuan engtikah mah rinna an nghat leh ngam ngai tawh dawn lo a ni.
Mizoram a thang zel dawn: Tun ai hian Mizoram hi a la thang thei a, a la thang zel bawk ang. Vawiina kan rotling neih thlawhna tumhmun leh railways te hi tun hma kum 50 velah khan kan suangtuah phak lo hle ang. Mahse hun lo kal zel leh khawvel changkanna chuan min rawn hrut tel a, vawiinah chuan kan heti ta a nih hi. Chuvangin kum engemaw zat hnuah chuan Chhim lamah pawh thlawhna tumhmun dang kan la nei lo vang tih a sawi theih hleih nem! Chu mi hunah chuan vawiina mi tam takin transport chungchanga Univerisity official lo zin turte veivah harsat dan tur, “Buana hmaa an lo kherh” hi an thaw huai tawh ang. A reng thu-ah hmun pawimawh pan tur chuan “A hla, a hla” kan ti ngai em ni? Zir tur, hnathawk tur leh damdawi tlan tur chuan hmun hla ber ber pawh kan pan lawng lawng thin a nih hi. Aizawl atanga 175km leka hla Lungleia State University awm tur hi ram hla bera dah tur ni awm ang maia kan lo engto hi chu a fel bik chiah lo.
CM hian eng rilru pu-a State University hi Lungleia awm tura thu a tih tluk chu kan hre pha hauh lo va. Mahse, hetiang thutlukna hi mi hawi zau leh hmathlir thuite tih chi chauh a ni. Brig. |henphungan Aizawl tawt lutuk tur ven nana Govt Complex Lungmual a lo ruahman te khan a thlir thui hle kan tih fo hi. Chhunzawm ngam an awm ta lo mai pawh a ni.
Chuvangin Lunglei lama State University awm tur hi hlohna ni lovin hlepna a ni ngei ang.
I lo thlir zel phawt teh ang.