Lungleiah raltlan chhinchhiah mek

Lungleiah raltlan
chhinchhiah mek
District Level Committee on Myanmar & Bangladesh Refugees Lunglei chu Nilaini khan additional DC Zoramdini hoin an thukhawm a. Lunglei district-a Myanmar leh Bangladesh atanga raltlante khawl hmanga an nihna finfiah theihna tura chhinchhiahna, ‘biometric enrollment’ kalpui mek dan an sawiho.
Sawrkar official-te, Lunglei Local Council Association leh Sub-Hqrs YMA Lunglei aiawh leh Refugee Welfare Committee aiawh an tel.
Raltlan biometric enrollment hi Lunglei district-ah kumin July 30 khan kalpui tan a ni a. Lunglei Ramthar refugee camp-ah bul tan a ni. Ramthar camp-ah hian zawh tawh niin, tunah hian Thaizawl camp-ah tih leh mek a ni.
Biometric enrollment atana hmanraw mamawh belh lei tura ruahman a ni tih sawi a ni a. Village council /local council leh Sub-Hqrs YMA nen tangrualin felfai taka enrollment kalpui a nih theihnan hma lak zel nise, tih a ni.
Raltlante kim taka chhinchhiah an nih theihnan camp leh camp pawna awmte pawh tuam chhuah vek tum a ni a. Enrollment tih laiin power supply-ah buaina a awm lohnan Power & Electricity department chu hma la tura ngen an ni.
Lunglei bawrhsap office chhinchhiah danin, kumin August thleng khan an district-ah raltlan awm khawmna camp 9 – Haulawng (Saichhoh), Hauruang, Khawmawi, Mualthuam North, Phairuangkai, Pukpui, Ramthar, Thaizawl leh Vanhne-ah awmin, hengah hian Myanmar atanga raltlan 1175 an awm. Camp pawn lam, khawchhunga in luah leh mi ina mikhual 816 awmin, an vaiin raltlan 1991 an awm mek. Mipa puitling 545, hmeichhe puitling 660 leh naupang (kum 18 hnuailam) 786 an ni.
Lunglei district-ah hian Bangladesh atanga raltlan mi 63 awmin, Khawmawi khuaah vek an awm a. Mipa puitling 18, hmeichhe puitling 17 leh naupang 28 an ni.