Lungleiah veng fai inelna endik tan

Lunglei Municipal Council (LMC) huamchhunga ward hrang hrang chu fai inelna atan an inbuatsaih mek a. LMC Award 2024 atana endik thawh khatna chu panel of judges convener, LMC secretary Lalrinawma hoin neih a ni.
Ward fai endiknaah hian Local Council Association, MJA Lunglei District, Sub-Hqrs YMA leh Sub-Hqrs MHIP hruaitute an tel a. Nilaini khan Ward No. 1 hnuaia Pukpui leh Zotlang leh Ward No.3 hnuaia Bazarveng leh College Veng endik a ni. Ward danga hnuaia veng hrang hrang pawh endik chhoh zel tum a ni.
LMC Award 2024 atana fai intihsiak hi kumin July 1 atang khan kalpui niin, kumtluana inel tur a ni. Hemi pual hian LMC huamchhunga ward tina veng hrang hrang chuan veng chhung faina kawngah hma an la mek a. Faina kawnga hmalakna tehfung hrang hrang hmangin veng fai endik a ni a, January 2025-ah result puan a, lawmman sem tum a ni.
Ward fai inelnaah hian Ward fai ber hnenah cheng nuai 3 leh trophy, 2-na nuai 2 leh trophy, 3-na nuai 1 leh trophy a ni ang. Ward pakhat hnenah consolation prize cheng sing 3 leh citation hlan a ni bawk ang.