Breastfeeding Week hawng

Naute tan nu hnutea chawm ngei a that zia inzirtirnana khawvel huapa a haptaa hman – World Breastfeeding Week chu Ningani khan hawn a ni a. Aizawlah pawh hman a ni.
Civil Hospital Aizawl Paediatric Ward-a hmannaah National Health Mission mission director Dr Eric Zomawia chuan, India rama damdawi in tha tehnaah Civil Hospital Aizawl thlan tel a ni chu lawmawm a tih thu leh Paediatric Department bik phei chu naupang enkawlna tha bik (Muskan certified) zinga thlan tel a ni, tiin, Paediatric department-a doctor leh nurse ho hnenah lawmthu a sawi a ni.
Nausen chu a pian atanga darkar khat ral hma ngeia nu hnute hnek tir nghal a tha tih a sawi a. Thla 6 an tlin thlenga nu hnute tui chauh hnektir a pawimawh tih a sawi bawk.
Reproductive and Child Health state programme officer Dr Lily Chhakchhuak chuan Breastfeeding Week hi August 1-7 chhunga hman tur a ni a, district hrang hrangah tha taka kalpui tur a ni tih a sawi. Nu hnute ngei naute in a hnek hian an thanlen zelnaah an hrisel bik a, natna tam tak lakah a veng a, an rilru thlengin a tichak tih a sawi a ni.