Macron-a’n India a tlawh hmaa Rafale leina tur tihfel tum

Macron-a’n India a tlawh hmaa Rafale leina tur tihfel tum
French President Emmanuel Macron-a’n February thla tawp hian India a tlawh dawn a, hemi hma hian Defence Acquisition Council (DAC) chuan France atanga Rafale indo thlawhna 114 leina tur a pawmpui dawn niin sawi a ni.
Defence Minister Rajnath Singh-a kaihhruai DAC hi dollar tluklehdingawn tel senna tur, Acceptance of Necessity (AoN) ngaihtuah tur hian an thukhawm thuai dawn nia sawi a ni a. Defence secretary kaihhruai, Defence Procurement Board chuan thla hmasa khan Rafale leina tur hi a lo pawmsak tawh a ni.
DAC-in a pawmpui leh a nih chuan India-in tum khata indo thlawhna a lei tam ber tum a ni thei hial dawn a, Rs vaibelchhe nuai 3.25 senna tur a ni ang.
Indian Air Force (IAF) hian squadron a nei tlem tawh hle a, fighter squadron 29 vel chauh nei tawhin khawthlang leh hmar lama nawrna a tawh mek reng avangin 42 tal neih tuma ruahmanna siam a ni.
Ruahman dan chuan thlawhna 114 lei tur zinga 18 hi ram danga siam tur niin a dang zawng erawh India-a siam tura tih a ni a. Heng zinga 80% hi tual chhuak a ni ang a, a part hrang hrang 60% chu Make in India hnuaia siam tuma ruahman a ni bawk.
Ruahman dan zel chuan IAF hian mi pakhat chauh chuan theihna 88 leh mi pahnih chuan theihna 26 neih a tum a. A siamtu, Dassault Aviation chu Indian mi mal company-te nena inremna siamin tual chhunga siam theih tura ruahman a ni.
Ram venhimna lama chinchang hriate chuan Rafale hi IAF tana pawimawh tak a ni tih an sawi a. Pakistan leh China nena inepna awm mek zelah thil tangkai ni thei turah an ngai a ni.