US-in June-ah indo tihtawp vek a duh – Zelensky

US-in June-ah indo tihtawp vek a duh – Zelensky
Ukrainian President Volodymyr Zelensky-a chuan tun kara US-in an pahniha inbe tura an rama a sawm rualin Washington hian Russia nena an indo mek chu June thlaa tihtawp hman a duh tih a sawi.
“America hian a vawi khat nan Ukraine leh Russia palaite chu US-a inbe turin a sawm a, Miami-ah pawh a ni mai thei a, keini chuan kan tel tur thu kan tichiang tawh” tiin Inrinni khan a sawi.
Washington leh Moscow chuan engmah sawi an la nei ve lo va; mahse, US President Donald Trump-a hian kum khat chuang kal taa rorelnaa a thut atangin indo titawp turin a nawr reng a ni.
Hetih lai hian Russia hian Ukraine-a energy hmunte a beih chhunzawm reng a, khaw vawt tak hnuaiah êng leh intihlumna nei lo an tam phah hle.
Zelensky-a chuan Inrinni khan Zirtawpnia an zawh tak, US rawtna anga ram pahnih aiawhte Abu Dhabi-a a thawh hnih nana inbiakna chuan thil liantham sawi chhuah an nei lo tih a sawi.
‘A khirh lai chu a la khirh reng’ tih sawiin heng zingah hian Ukraine-in ram a chân tur pawh a tel.
Ram pathumte hi an aiawhte ni lo, an hruaitute a vawi khat nana inbiak pawh sawi a ni a; mahse, hemi tur hi chuan ‘inbuatsaih ngai a tam’ tih a sawi.
Inremna siam hun atana hun ruat chungchangah Ukrainian hruaitu chuan, “American-te hi chuan engkim June-a tihfel an duh,” a ti a. Nipui hmaa tihfel an duh chhan hi an ram chhung thil vang a ni tel a, November-a midterm inthlan an neih turte vang niin a sawi bawk.
Palaite indawr mek karah Russia hian Ukraine a bei chhunzawm zel a. “Russian dan bawhchhiaten Ukraine-a energy hmunte nasa takin an bei chhunzawm,” tiin Ukrainian Energy Minister Denys Shmyhal-a chuan Telegram-ah a tar lang.
Shmyhal-a hian electricity pek chhuahna, substation bakah power line an bitum nasa a, power plant pawh an khawih bawk tih a sawi.
Ukraine-a sorkar energy operator, Ukrenergo chuan beihna an tawh nasat avangin power indaih lohna a nasa tih a sawi a. Shmyhal-a chuan an thenawm, Poland hnenah emergency power supply an dil tih a sawi bawk.
Zelensky-a chuan Zirtawpni zan khan social media-ah drone 400 leh missile 40 chuanga beih an ni tih a sawi a. Air-defence system-in tam zawk lo kap thla mah se a zavaiin a ni lo tih sipaiten an sawi.
“An tum ber chu energy grid, a siam chhuahna leh sem chhuahna a ni,” tiin region pali velah an khawih chhia tih a sawi.
Khawthlanga Lviv region-ah Dobrotvir power plant beih niin mi sang telin electricity an neih loh phah niin region hotu, Maksym Kozytskyi-a’n a sawi a. Mi 6,000 vel chu darkar bia a chhawka pek an ni tih a sawi.
A bul, Ivano-Frankivsk region-a Burshtyn power plant pawh kah fuh a ni.
Dobrotvir leh Burshtyn plant enkawltu, DTEK chuan October, 2025 hnuah an plant-te hi vawi 10 beih a nihna niin an sawi a. Kum li kal taa indona a chhuah atangin vawi 200 chuang an hmuhma beih a ni tawh niin an sawi bawk.
Ukraine pawhin Russia hi kapin khawthlang, Tver region-a missile fuel siamna hmun an kap fuh niin Ukrainian venhim hna thawktuten an sawi a. Chhim lama Saratov region-ah oil depot an kap fuh bawk.
February, 2022 atanga Russia-in a rûn chinah Ukrainian sipai 55,000 vel thi an awm tawh niin kar hmasa khan Zelensky-a chuan a sawi.