Macron an Russia tukzala a awm hmu duh lo

French President Emmanuel Macron chuan Ukraine ah Russia chu tlawm mualpho lutuka siama a awm a hmuh duhloh thu a sawi a.
Frenc media te nena thusawi a neihah Macron chuan Western ram te chu Kyiv military support tam zawk pe tura ngenin indona hun awhrei tak beiseia inbuatsaih turin a ti bawk a.
“Ukraine indonaah Russia hi hnehin awm se ka duh a, Ukraine hian a dinhmun humhim ngei se ka duh a ni” tiin a sawi a.
Mahse, mi thenkhatte Russia chu ram a nihna ang pawha chhutkehdarh biai duhte chu a sawisel thung.
Hetihlai hian world leaders te chu Munich Security Conference ah sawihona nei dawnin khawvel chuan Kyiv hnena ralthuam tam zawk pek leh Russia chu nazawka hrekbelh dan an ngaihtuah dsawn a ni.
“Mi thenkhatte duh dan ang lo takin Russia mualhpo taka siam kher kan tum a ni tur a ni lo va, ama ram chhung ngeiah Russia hi kan bei tur a ni lo” tiin Macron chuan Le Journal du Dimanche hnenah a sawi a.
“Mithenkhatte chuan thil dang zawng aiin Russia chu tlawm thjaka mualphova siam an duh a ni. Chu chu France ngaihdan a ni ve ngai lo va, a duh hek lo” tiin a sawi.
Macron chuan Munich a press conference a neihah pawh tun hi Moscow nena inbiakna kalpui hun pawh a ni lo a ti bawk a. Chutihrual erawh chuan inremna a awm theih nana peace talk neih chu tihmakmawh a ti thung.
Macron chuan Ukrainian military te thlawp chu ‘Russia inremna dawhkan kil tur leh inremna tluantling awm theih nana’ kawng awmchhun tiin a sawi bawk a.
Hei bakah hian Russia a thuneihna inthlaktir tuma chetlak nise tia ngaihdan chu hnawl bawkin khawvel hmun dangah chutiang chetna chu a hlawhchham thin tiin a sawi bawk.
Hetihlai hian Ukraine leaders te chuan Russia nena inbiakna neiha inremna siam lam ch an awn lo hle thung a. Ukraine ForeignMinister Dmytro Kuleba chuan Munich conference a Russia tel tura sawm a ni lo hrim hrim pawh lawmawm a tih thu a sawi bawk a.
Russian leader te hi ‘mi an tihhlum a, bomb an hman a, missile leh tank te chu international politics a inhnial nana an thehchuak chhung chuan’ inremna dawhkan kil tura sawm a rem lo a ti.
President Volodymyr Zelensky pawhin Russia nena inremna zawnga inbiakna neih chu hnawl nghal bawkin Putin nen an inkarah ‘inrintawnna’ a awm lo a ti bawk a. Hei mai bakah hian a hma in Moscow nena inremna awm theih nana Ukraine in a ram bung thnekhat a chan a ngai tia ngaihdan awm chu a hnawl bawk.