MADC Fur thutkhawm nei tan

Ni hnih awh tur Mara Autonomous District Council Monsoon Session chu Nilaini khan MADC chairman N Viakhu kaihhruaiin tan a ni.
Chairman chuan rorel tan hma in, tunhnaia nominated member chatuan ram pan ta N Gracy leh MDC hlui HC Chhiesa uina thuchah sawi niiin, an sawi zawhah sunna hun hman a ni.
Tun tum session-ah hian starred question 14 leh unstarred question 1 a awm a; official bill pahnih, official rules pahnih bakah official resolution pakhat leh private resolution pakhat putluh a ni. Nilainia House-a chhan chi zingah – MADC project siamah beiseiawm tak tak an neih thu, Environment & Forest Department-ah Nagarvan Scheme hnuaia cheng nuai 137 thawh mek a nih thu, Cyclone Remal chhawmdawlna atan Rs. 11,90,350 hman a nih thu te a tel a ni.
Official resolution hi – “Mizoram: The Scheduled Castes and Tribes list (Modification) order 1956 leh Act 81 of 1971 List No.8 a ‘Lakher’ tih chu ‘Mara’ tiin India sawrkarin min thlaksak rawh se” tia MADC hminga dilna tur chu sawibuaitu awm loin lungrual taka pawm a ni. Resolution dang chu sawiho a ni a, vawiina passe tum a ni.