Madonna leh Elton John inkar a tha ta

Madonna leh Elton John inkar a tha ta
Kum 20 zen zawn an inhmuthiam loh hnuah pop khawvela milian pahnih Madonna leh Sir Elton John te chuan an inkara boruak tha lo an dah bo ta tih an puang.
Madonna hian niminpiah khan a Instagram-ah thlalak post-in, “A tawpa tawpah chuan kan inhmuhthiam lohna te kan phum bo ta,” tiin a caption-ah a dah a, “Tun weekend khan @eltonjohn SNL-a a perform ka va chhim ve a!! WOW,” a ti bawk.
Madonna hian high school a kal lai Elton John show a en atangin pop khawvela luh ve chakna a neih phah a, a nun thlak danglamtu a nih thu sawi a, mahse, chutiang khawpa a mi ngaihsanin ualau tana a sawiselna a dawn avangin na a ti a, an inhmelmak phah ta ni a swiin, “Ka mi ngaihsan em emin mipui hriat tura artist ka nihna anga min ngainat loh thu a puang mai khan kum tam tak min tina a. Ka hrethiam thei lo a ni,” a ti.
An inkar chhiat tanna chu 2002 daih tawh kha a ni a, Elton John hian Madonna-i’n James Bond film tana a hla record ‘Die Anoter Day’ chu “Bond hla awm tawh zawng zawnga chhe ber” a tihsak a. Heta tang hian tawngkam meinei tak takin an inti chhunzawm ta deuh reng a, 2024 Q Awards-a Madonna-i’n best live act a dawng tum pawhin Elton hian, “Madonna, best live act? F— off. Engtik atangin lip-synching hi live a lo nih tak? Man chawia kan en a mipui hmaa lip-synch ho chu kah pawp mai tur niin ka hria,” a ti.
2012 khan, 69t annual Golden Globes-a Madonna ‘Masterpiece’ leh Elton John ‘Hello Hello’ te chu best original song-ah nominate an ni dun a, Madonna zawkin award a dawng ta a, Elton John-a kawppui, David Furnish chuan a Facebook account-ah Madonna award dawn chungchang sawiin, “A tha tha an thlang lem lo,” a ti a. Hei hi Madonna pawhin chhang letin, “Min ngei lak lawh nge, ka hrethiam bik lo. A thluak a ta a, ka dah sang bawk, chuvangin award dang a la dawng ve leh mai ang. Ka la na hran lo e,” a ti ve thung.
Mahse, tunah chuan an boruak a tha ta. Inrinni kaltaa SNL backstage-a Elton John hmuh tuma Madonna va kal chu Elton zawkin thupha a lo chawi nghal zung zung niin Madonna chuan a sawi a, “’Min ngaidam rawh’ a ti a, tichuan kan inkar daidanna bang chu a chim ta nghal a ni. Ngaihdamna hi ralthuam chak tak a ni. Minute reilote chhungin kan inkuah thei ta nghal mai a ni,” a ti a, Madonna chuan, “Chuan, ka tan hla a phuah tih min hrilh a, sak dun a duh a. Engkim a rawn kual dik nghal thlup a ni mai,” a ti bawk.
Elton John pawhin Madonna post hi comment-in, a tawng tam mah mah thin Madonna-i’n a ngaihdam avanga lawmthu sawina dah pahn, “Ka thil lo sawi tawh kha a zahthlak khawp mai. Artist anga i kutchhuak ropui tak tak te ka ngaihtuah hian. Hmalam kan pan thei hi lawmawm ka ti,” a ti bawk.