Madrid Open-ah Mirra mir

Madrid Open-ah Mirra mir
A tumhnihna atana WTA main draw chuangkai ve chiah Russian tleirawl kum 15 mi Mirra Andreeva chuan Madrid Open kal mekah Nilaini thleng khan hnehna la chang tluang zelin, last 32 a lut fel a, kumin January thla Australian Open semi-finalist Poland 17th seed Magda Linette lakah fiahna dang a hmachhawn zui leh.
Wildcard hmanga he clay tournament khel pha ve chauh Mirra hian 7-6 (8-6) 6-3-in world number 14 Beatriz Haddad Maia a hneh nawlh a, kum 2000 hnu lamah kum 16 tlin hmaa top-20 ranked player chin hneh thei naupan lama pasarihna a ni.
Brazil player Haddad Maia a hneh hma ni chiahin Russian tleirawl hian 2021 US Open finalist Leylah Fernandez pawh round one lamah a lo paltlang tawh a, third round a lut zui leh ta mai mak a tih zawkzia 194th-ranked Andreeva chuan sawi-chhuakin, “Mi zawng zawngin an level phain ka khel ve tih min hrilh a, kei aiin an ngialnghet zawk thung,” a ti.
Belarusian second seed Aryna Sabalenka leh American tleirawl kum 19 mi Coco Gauff-te pawh chak langsar zingah telin, Australian Open cham-pion Sabalenka hian karliamta Stuttgart final-a Polish world number one Iga Swiatek a hneh loh hnuah Madrid a pan ding nghal a, 6-4 6-3-a Romanian Sorana Cirstea hnehin third round a lut.
Sixth seed Gauff hian Spain nula Irene Burillo Escorihuela laka 6-4 6-1 hnehna chang turin darkar khat leh minute 17 chiah a mamawh a, a chipui Paula Badosanen third round-ah an intum ang.
Kum 15 mi lek a nih lai kum 2019-a WTA Tour luhchilh tawh Gauff hi Andreeva hmaa kum 16 hnuai lam player zinga top 20 chian luah pha player hneh thei hnuhnungber a ni.
World number two hlui Ba-dosa chuan Italy nula Elisabetta Cocciaretto a hmachhawn laiin a ke lamah hliam tuar mah se darkar hnih leh a chanve chhung teh meuh a beih hram hram rah sengin 6-3 4-6 6-4 hnehna nen round sang zawk a inhlangkai.
Germany nula Jule Nie-meier chuan Madrid-a vawi-thum ngawt champion tawh Czech 10th seed Petra Kvitova barakhaihin, French fifth seed Caroline Garcia pawhin Kazakhstan star Yulia Pu-tintseva lakah 6-3 6-4 hnehna a chang ve bawk.