Hindu sakhaw kûtpui hman mek, Maha Kumbh an hmanna pui ber, Uttar Pradesh-a Prayagraj-ah Nilaini khan a kalte chuanna bus chu Vrindravan-ah a kang a, upa pakhat kang hlumin mi dang 49 erawh harsa takin an tlan chhuak a, an him hlauh.
Thi hi kum 60 mi, Sheelam Drupath niin Palsi khua, Nirmal district, Uttar Pradesh a ni.
Dam chhuakte hian kût hmanna hmun hi an pan mek laiin an chuanna bus hi a kang ta tih an sawi.
Kang thelhna hmanruain a hmun thleng nghalin bus pawh an thellh nghal a; mahse, Drupath ruang hi an hmu zui ta a ni.
Tar lan tawh angin Maha Kumbh hi India rama khawpui paliah hman mek niin Prayagraj hi a hmanna pui ber a ni a. Kum 12 dana neih thin kûtpuiah hian India ram chhung bakah khawvel ram hrang hrang atangin Hindu sakhaw zuitu mi maktaduai 400 vel pungkhawma an lui thianghlima inbual tura ngaih a ni.
Prayagraj-a sakhaw punkhawmna lian thleng mekah hian sorkar pawh a inbuatsaih nasa a. Mikhual thlenna tur puan in sang tam tak bakah inthiarna te, bual in te, kawngpui te, ei leh in siamna hmun te siam belh a ni a. Sum leh pai pawh nasa takin an inseng a, chutih rualin mikhual thlenna atang hian an sum sen let fe hmu let turah an inngai.
Maha Kumbh hmangtute chuanna bus kang
Get real time updates directly on you device, subscribe now.
Prev Post