Maharashtra-a tangrual sorkar chhungah neuh neuh?

Maharashtra-a tangrual sorkar chhungah neuh neuh?
Thla thum liam taa Maharashtra assembly inthlana BJP-Shiv Sena-NCP tangrual (Mahayuti tia hriat)-in hnehna an chan hnu lawkah an inkarah neuh neuh a awm mek nia sawi a ni.
Maharashtra-a NDA-a telte inkara khi hi politician hriat hlawh tak takte venhimna pek thin, ‘Y-Security cover’ an tih hlih leh tihhniam atanga intan nia sawi a ni.
Tun hnai khan Special Protection Unit (SPU) chuan politics hruaitu, minister leh MLA-te chu an dinhmun hlauhawm dan azirin venhimna a pek thin a ennawn a. Hruaitu thenkhat, a bikin Eknath Shinde-a lamtangte chu venhimna pek thin tihhniamsak an ni.
Hei hi Mahayuti chhunga inrem lohna bul ber nia sawi niin a bikin BJP hruaitu, Devendra Fadnavis leh Shiv Sena hotu, Shinde inkarah a nasa zual nia sawi a ni.
Cabinet member leh ministers of state zawng zawng leh Chief Minister Fadnavis leh a deputy pahnih chu ‘Y-plus’ security pek niin escort vehicle pek an ni bawk.
Politics hruaitu thenkhat erawh venhima an dawn thin tihhniam a ni.
Politics-a inpawhna a awm hian hruaitu thenhat hian tun hmaa an dawn ang ni lo hlauhawm a awm thei thin a, cabinet leh sorkara an tel zui phei chuan a ni zual duh a. Shinde-a lamtang MLA tam tak pawh chutiang ni thei chu an ni.
Kum 2022-a Shiv Sena MLA hel thenkhat, Shinde-a lama tangte pawh kha venhimna mamawh zual tur an ni a. Chief minister a nih lai khan Uddhav Thackeray-a kalsana a lama kal MLA 44 leh Lok Sabha MP 11 chu ‘Y-plus’ pek an ni.
Tuna ennawnah hian heng zinga tam tak hi an venhimna hlihsak an ni.
Mahayuti-a tangrualte inrem lohna lian tak dang chu guardian minister ruat chungchangah a ni tel a. Shinde-a pawh hi Thackeray-a a kalsan khan chief minister sawi hmuh a ni a, tuna a dinhmunah hian a lawm lo bawk.
Fadnavis-a’n Raigad leh Nashik district guardian minister tura Shiv Sena hruaitu dah rawtna awm chu a duh lo nia sawi a ni.
Shinde-a leh NCP inkarah pawh inrem lohna a awm a. Sorkarin Raigad guardian minister atan NCP MLA Aditi Tatkare dahin Nashik atan BJP MLA Girish Mahajan a dah bawk vang a ni.
Guardian minister-te hi minister ang chiah niin an chan pual bika hmasawnna thlena viltu tur atana ruat an ni thin.
Fadnavis leh Shinde inkara inmil lohna hi Shinde-an tun hnaia Kumbh Mela chungchanga Fadnavis-a’n thutkhawm a kohva a tel loh atang khan a lang zual nia sawi a ni.
Shinde tel lo mah se thutkhawm hi a kaltlangpui a, hei hi Fadnavis-a thuneihna a dodal ngamna lantirna pakhata ngaih a ni.
Hei hi eptuten sawi chhuak nghalin MP Priyanka Chaturvedi chuan, “Mahayuti hian Valentine month an lawm,” tiin X-ah a tar lang.
Tun hnaiah Thackeray-a kaihhruai Shiv Sena hruaitu lawkten thla hnih leh a chanve liam ta chhungin chief minister hi vawi thum an hmu tawh a. Aaditya Thackeray-a’n vawi hnih hmuin Uddhav-a’n vawi khat a hmu tawh a, hruaitu dangte pawhin a hranin an hmu tawh hlawm bawk.
Hetih lai hian NCP (SP) chief Sharad Pawar chuan Shinde chu New Delhi-ah hmuin Maratha palsaltha, Mahadji Shinde hminga chawimawina siam a hlan bawk a, nasa takin a fak bawk.
Politics thiam, Abhay Deshpande chuan tangrual chi hniha party-te hian an elpuite an chhaih vel mek niin a sawi.
Tun thla tir khan Chief Minister Fadnavis-a chuan Maharashtra Navnirman Sena President Raj Thackeray hmuin hei hian BJP leh MNS an thawhho mai rinna a siam.
Eptu tangrual, Maha Vikas Aghada chuan tangruala rorel mek chhungah neuh neuh a awm avangin hetiang hian mi thar dap ta angin an sawi zui.
Sawi a awm mek laiin Deputy Chief Minister Shinde chuan Thawhtanni khan Fadnavis-a nena an inkarah engmah inmil lohna a awm lo niin a sawi ve thung.