A vahpa (nephew) leh rebal faction te beih chhunzawmin Nationalist Congress Party, NCP president Sharad Pawar chuan a ideology ‘phatsantu’ te chuan a thlalak an hman a rem lo tiin a sawi.
Hetih lai hian NCP ival faction pahnih te uncle leh nephew te chuan NCP party member nei tam zawk nih inchuhin chet an la dun mek a.
-- Advertisement --
“Phatsanna”
“Ka ideology phastantu leh ideology a ngaihdan hrang neite chuan ka thlalak an hmang thei lovang. party national president kan nihna leh Jayant Patil State president a nihna chauhin ka thlalak an hmang thei ang,” tiin NCP patriarch chuan a sawi a.
Hetih lai hian Ajit Pawar – Pathiannia a Eknath Shinde-BJP sorkar a Deputy Chief Minister atana lakluh chuan Mumbai-ah rebel leader dang Praful Patel leh Chhagan Bhujbal te nen NCP party office thar an hawng thung.
He office-ah hian Sharad Pawar thlalak flex board hmanga an tar mai bakah party office chhungah pawh a thlalak frame an tar bawk a, rebel MLA leh Ajit Pawar te chuan Pawar senior chu an rilru leh ngaihtuahnaah chatuanin a awm ang an ti bawk.
‘Hmelma ni ta’
Rebel group te Ajit Pawar kaihhruai tena Sharad Pawar thlalak an hman chungchangah NCP leader leh senior Pawar loyalist Jitendra Awhad chuan MLA hel te chuan NCP chief-in principle din ngheh burna a neih phatsan an hreh hauh lo tiin a sawi a.
“Ajit Pawar camp lam hian Sharad pawar hman timna reng an nei lo va, tichung chuan Pawar din ngheh tlatna Shahu-Phule-Ambedkar [Rajarshi Shahu-Jyotirao Phule-Dr. Babasaheb Ambedkar] te ideology chu communal force te nena inzawmin an phatsan hreh hauh lo. Tunah chuan Pawar hi in hmelma a ni tawh,” tiin Awhad chuana sawi.
MLA 44
NCP legislator 53 zinga a tam ber te chu Sharad Pawar lamtang an ni ang tiin NCP State chief Jayant Patil chuan MLA tam berin an tlawp a, a thente erawhin neutral nih an thlang, tiin Patil chuan a sawi a.
NCP MLA tlan tau pakuate lakah chuan hremna lekkawh a nih theih nan hma an lak thu sawiin mahse MLA 44 te chu Sharad Pawar lama bei nghet tlat an ni a ti bawk.
State tour
Patil chuan senior Pawar chuan State chhung fankual a neih nghal tur thu sawiin a hmasa berin Nashik, Beed, Ahmednagar, Pune leh Solapur te a tlawh hmasa phawt ang a ti a.
“Ni sa emaw ruahsur emaw Pawar chu a zin chhuak dawn tho va. Karad a tlawha amah thlawptu tam takte atang khan amah an duhna a lang a ni,” tiin Patil chuan a sawi bawk.
Hetih lai hian NCP thawhpui Opposition coalition – Congress leh Uddhav Thackeray kaihhruai Shiv Sena (UBT) te chuan Sharad Pawar chu an thlawp tlat thu leh Maha Vikas Aghadi (MVA) chu NCP ah buaina awm mahse nghet taka a din tlat thu an sawi bawk a.
Tun hnaiah Shiv Sena (UBT) leader Sanjay Raut leh Maharashtra Congress chief Nana Patole te pawhin Sharad Pawar chu an hmu tawh bawk.
MVA inlungrual
Raut chuan Sharad Pawar nen an inhmuhnaah, “Thil hrang hrang kan sawi dun a. MVA banner hnuaiah kan inlungrual tlat a ni. Rahul Gandhi, Uddhav Thackeray or Sharad pawar pawh ni se an inbe pawp tawn reng a. Tute pawhin BJP politics chuan India chu dictatorship kawngah a hruai tih ngaihdan an nei a ni. BJP te hi India ram party a corrupt ber an ni a. He sorkar mek hi Shiv Sena leh NCP faction phelte kara ding mek a ni,” tiin a sawi bawk.
BJP te chet lak dan chu ‘serial killer’ te chet lak dan tia sawi bawkin Raut chuan group ti phela party hming chuh chata an chet lak zel dan hi Delhi-a BJP hotu lawkte ruahman vek zel a ni tiin a sawi a.
“BJP te chet dan hi serial killer te chet dan niin party an tikeh a, an tiphel zuia chutah party hming leh symbol an chuhzui a. BJP te hian Bal Thackeray leh Sharad Pawar party te tihchhiat vek an tum tawh a, mahse Sena (UBT) chuan indonaah chak zawk a chang a ni,” tiin a sawi bawk.
Ajit Pawar tang khawng
Ajit Pawar chuan dik lo takin misuala chhuah nia a inngaih thu a sawi a. Sharad pawar chu pathian tluka an ngaih a nih thu leh a malsawmna an dil thu a sawi a.
Chutih rual chuan party chhunga thuneihna inhlanchhawn chungchang chu sawiselin, “Mi thenkhat tana kan piang lo hi kan tihsual a ni bik lo,” tiin a sawi.
“Kum 2017 khan Varsha Bungalow (CM official residence) ah meeting kan nei a. Chhagan Bhujbal kaihhruaina hnuaiah Jayant Patel, kei leh midang dangte pawh kan tel a ni. BJP leader thenkhatte pawh an tel a. Cabinet portfolio leh guardian minister kaihhnawih thenkhatte kan sawi ho va. Mahse, kan party leadership te chuan kan duh dan lovin chet an la zui a ni,” tiin AJit Pawar chuan a sawi a.
Nikuma Shiv Sena a keh chhiat khan NCP MLA tinte chuan Sharad Pawar hnenah sorkar zawm an duhna an thlen a ti a. “Eng vanga kan dilna chu hnawl nge a nih ka hre lo va, kan lehkhathawn photocopy ka la nei tha reng,” tiin a sawi bawk.
“Kum upat chinah chuan mi an chawl mai a, BJP leader te pawh kum 75-ah an chawl mai a. Min tiphur se, kan dik loh chuan min hrilh dik mai se. Mahse, thalai zawk te hun remchang min pek a ngai a ni. I chawl dawn nge dawn lo? Min malsawm la. I bang a, a hnu lawkah i thutlukna i sut leh a, eng vang nge ka hre lo,” tiin Ajit Pawar chuan Sharad Pawar chungchang chu a sawi bawk a.
“Maharashtra Deputy Chief Minister tum nga ka ni tawh a, chu chu record ding lai a ni. Kei ngei pawh hian Chief Miniser niha State kaihhruai hi ka duh ve tawh a ni,” tiin Ajit Pawar chuan a sawi bawk.