Maharashtra chief minister turah BJP an hmanhmawh lo, cabinet tihfel phawt an tum

Maharashtra chief minister turah BJP an hmanhmawh lo, cabinet tihfel phawt an tum
BJP chuan Maharashtra-a sorkar thar an din turah chief minister tur an hmanhmawh loh thu leh minister leh an hna chanpual tur tihfel phawt an tum zawk thu an sawi.
News agency PTI-in an party-a mi pawimawhte hnen atanga thu a dawn danin tangho chhunga cabinet tur chin fel hmasak phawt an duh niin an tar lang.
Thawhlehni khan Maharashtra larsap chuan chief minister kal chhuak, Eknath Shinde chu bânna a thehlut rualin sorkar thar din fel hma chi a hna lo chelh chhunzawm rih turin a ti.
BJP-Shiv Sena-Nationalist Congress Party (NCP) tangho hi an state assembly inthlanah khan hneh taka thlan tlin ni mah se tunah thleng hian chanvo sang ber chelhtu tur hi a la chiang lo.
Maharashtra BJP hruaitu hlun tak pakhat chuan PTI hnenah, “Thutlukna siam hmasak dan tur indawt kan nei a, a pawimawh hmasa chu sorkar thar ruangam tur a ni a. Hetah hian minister-te hna chanpual tur leh district tin vil thei tur minister siam fel pawh a tel,” a ti.
“Kan party hotu lian zawkte pawh chief minister thutthlenga thu tur tihfelah hian an hmanhmawh rih lem lo,” a ti bawk.
BJP kaihhruai, Mahayuti tia an sawite hian Maharashtra assembly inthlanah khan bial 288-ah 230 (BJP-132, Shiv Sena-57 leh NCP-41) zet lain an chak chiang hle.
Lehlama tangrual, Maha Vikas Aghadi (MVA) chu an che chhe hle thung a. Uddhav Thackeray-a kaihhruai Shiv Sena (UBT) chuan bial 20 chauh an la a, Congress-in 16 leh Sharad Pawar-a kaihhruai NCP (SCP)-in 10 an la bawk.
Chief minister hlui, Devendra Fadnavis chu ni leh tura rinkai ber a ni a, hetih lai hian Shiv Sena hruaitute chuan Eknath Shinde chu chief minister ni chhunzawm leh se an duh a. Ajit Pawar-a Nationalist Congress Party (NCP) chuan Fadnavis-a hi ni mah se an pawi ti lo.
BJP hian tual chhunga party-te inpawhna avangin chief minister tur hi an thlan uluk a ngai a. MLA thenkhat, Raigad district-a Mahendra Thorave angte hi inhnialna vawrtu ni thei an ni a, hetiang boruak a awm hian nasa zawka buaina a thleng thei thin tih an hria.
Member 288 awmna Maharashtra assembly-ah hian minister 43 thleng an awm thei a. District 36 a awm a, chief minister hian heng aiawh hi a thlan ve vek a ngai a ni.
Parliament session awm mek avangin an hruaitu lawkten Maharashtra BJP hruaitu leh an thawhpuite hi an la kawm tak tak hman lo nia sawi a ni.
Hetiang a nih avang hian chief minister tur tifel tur hian BJP central hruaitute chuan Mumbai-a observer tirh an tum nia sawi a ni a. MLA leh hruaitu lawkte hmuin cabinet tur an tifel ang a, chumi hnuah chief minister tur chu ngaihtuah chauh an tum nia sawi a ni.