Maharashtra Public Service Commission Member-ten MPSC tlawh

Mizorama cham mek Maharashtra Public Service Commission Chairman, Dr. Dilip Pandharpatte leh Member 3, Secretary leh Under Secretary te chuan nimin khan Mizoram Public Service Commission Office tlawhin Joint meeting neih a ni.
He Joint meeting hi J.C. Ramthanga, Chairman, MPSC chuan a kaihruai a, Dr. Dilip Pandharpatte chu Co-Chairman a ni. Meeting-ah hian Maharashtra Public Service Commission atanga lo kal bakah Mizoram Public Service Commission Member leh Senior Officer te an tel a ni.
J.C. Ramthanga, Chairman, MPSC chuan Maharashtra State lian atanga Mizoram Public Service Commission an rawn tlawh leh thil hriat belh duha an lo kal chu chhuanawm a tih thu leh, an thahnemngaihna chu fakawm a tih thu a sawi a. State hrang hrang PSC te intlawh tawn leh inzir tawn a pawimawh thu te a a sawi a. Tin, Maharashtra Public Service Commission chu Public Service Commission hlun tak a nih avangin kalphung tam tak ah changtlung zawk an nih avangin an tih dan te Mizoramin kan lo zir let zawk tur tam tak a awm thu te a sawi.
Dr. Dilip Pandharpatte, Chairman, Maharashtra Public Service Commission pawhin thu sawiin Mizoram an tlawh thei chu lawmawm a tih thu sawiin State hrang hrang Public Service Commission te intlawh leh inzir tawn a pawimawh thu a sawi a. Mizoram chu State te mah ni sela Public Service Commission zahawm leh hmingtha tak a nih thu te a sawi a. Maharashtra Team tena Mizoram an tlawhna tura Mizoram Public Service Commission-in a ruahmanna chu a tha tiin lawmthu a sawi bawk.