Mahindra Finance sum tihchingpen thubuaiah chargesheet thehlut tawh

Mahindra & Mahindra Financial Services Ltd. (MMFSL) chhunga sum tih chingpenna liantham Mizoram Police-in an chhui chu a hmawr an bawk fel thawkhat a, court-ah chargesheet an thehlut tawh.He sum tihchingpena a bultumtu Jakir Hussain bakah a thawhpui mi 14 bakah Mizorama car dealer pali pawh inhnamhnawih ngei nia hriat an nih angin thubuai siamsak zingah an tel a ni.
Mizoram Police hotuten an lo sawi tawh angin, kumin March 20 khan Mahindra & Mahindra Financial Services Ltd. (MMFSL) circle head Ankit Bagree chuan Aizawl Police Station-ah FIR thehlutin, Mizorama an area manager Jakir Habibur Hussain (41) Tuikhuahtlang, Aizawl (permanent resident – Tejpur Assam) chuan vehicle loan pek chhuah chungchangah sum a tichingpen nia an hriat thu a thlen a. March 29 khan MMFSL business head Chanpreet Singh chuan thubuai dang chu Crime & Economic Offences Police Station-ah he thilah bawk hian FIR a thehlut leh a ni.
Hnuchhuina atang hian he thila inhnamhnawih mi 20 chu hriatchhuah niin, kumin June 25 khan C&EO Police Station hian phek 182-a sei chargesheet an siam a. Aizawl Police Station hian July 10 khan phek 114-a sei chargesheet an siam nen chief judicial magistrate Aizawl District hnenah thehluh a ni ve ve tawh.
Hnuchhuina hi la chhunzawm zel a ni a, midang inhnamhnawih pawh an la awm nia hriat a ni a, mihring leh bungrua man belh a awm a nih chuan chargesheet hi a tul anga siambelh tum a ni tih Mizoram Police hotute chuan an sawi.
Hemi kaihhnawih nia langah hian tunhnaiah Crime & Economic Offences PS-ah thubuai dang ziahluh leh a ni a. Aizawl West District (Health department-in district a then dan) deputy chief medical officer Dr Lalnienga chuan tunhnai khan SBI Dawrpui Branch-a a CIBIL score a check-naah Mahindra & Mahindra Financial Services Ltd. hnuaiah a hriat lohin vehicle loan la anga process a nih thu a hriat chhuah avangin complaint hi a thehlut a ni a, hei pawh hi chhui chhunzawm mek a ni.
Hetiang complaint hi mimal, an hriatpui loha loan lem siamna atana an document an hmansakte hnen atangin a la luh belh zel an ring tih Mizoram Police hian an sawi.

8 He thil hi Mahindra & Mahindra Financial Services Ltd. (MMFSL) chhunga sum tih chingpenna lian ber, hmarchhak state pum tuamtu niin, Assam leh Mizorama a mawhphurtute chu man an ni tawh.
8 Jakir Hussain hian bank account lem, company phuahchawp – ‘Mahindra Finance Limited’ hotu lemchanga a siam bakah bank account 12, a neitute remtihna tel loin he pawikhawihna atan hian a hmang.
8 Jakir-a leh a thurualpuite hian rinhlelh an hlawh lohnan leh an loan account lem a NPA lohnan an loan account lem tan hian regular takin EMI an pe thin.
8 KYC verification, auditing, verification leh supervisory mechanism-a company system famkim tawk lohna te remchangah la in hun rei tak chhung hetiang hian thil an lo tichingpen tawh a ni.
8 Jakir Hussain hian a office, Khatla Aizawl atangin Mahindra Finance Company hnuaia a thawhpuite leh Aizawla car dealer-te nen inremsiamin he inbumna hi a kalpui a. Chhuichianna atangin he pawikhawihnaah hian cheng vaibelchhe 150 vel, car dealers – CK Hyundai Cars, NBE TATA, Rafael Nissan leh AIDU Motors Renault nen tanghoin an tichingpen nia hriat a ni.
8 Jakir-a hian a pawikhawihna atana pui turin Manoj Sunar chu thla khata Rs 15000 hlawhin a ruai a. Jakir-a hian document lem siamna atan stamp lem a siam thin a. Company-in audit an neih dawnin heng document lem hi office atangin a mi chhawr Manoj inah an thukru thin a. Manoj-a in hi dap a ni a, document lem buara bag 7 khat, file 549, kum 2022, 2023 leh 2024 amite man niin, stamp lem 25 man a ni
8 He case chhuizuinaah hian bank account 177, a belhkhawma cheng vaibelchhe 5 awmna hren niin, car model hrang hrang 15 man a ni. Heng car hlutna hi vaibelchhe 10.5 hu vel nia chhut a ni. Heng bakah hian customer lem loan lakna 2035, seal leh stamp lem 25, laptop 3, mobile phone 10, sim card 35, mimal ID card engemawzat leh pawikhawih nana hman nia hriat hmanrua eng engemaw man a ni.