Serchhip District Boxing Association chuan Mahindra Pikup 4×4 Mizoram Open Boxing Championship buatsaih tura hma an lakna a kal tluang hle a, boxer thahnem tham tak an tel theih ngei an beisei.
-- Advertisement --
A duh apiang tel theihin January ni 31 atanga February ni 3 chhungin Serchhip Boxing Hall-ah khelh a ni dawn a, mipa weight hrang 10 leh hmeichhia weight hrang parukah then a ni.
Serchhip Boxing-in board-casting rights atana sum an phut angte LPS Vision-in pe fel tawhin, Serchhipah kal chilhin live-in inhnek a pechhuak dawn a; Mana Motors chuan Mahindra Pikup 4×4 hmingin title sponsor an chang fel bawk.
Sports Minister Robert Ro-mawia Royte chuan hawnna inkhawmah tel a tum a, best boxer mipa leh hmeichhe tan Rs. 10,000 ve ve leh best challenger mipa leh hmeichhe tan Rs. 5,000 ve ve a pe dawn a, mamawh dang a ngaihtuahsak bawk.
Serchhip district bawrhsap Nazuk Kumar, IAS pawhin a phurpui hle a, an district-in Mizo-ram pum huap inelna liantham an buatsaih thei tur chu thil ropui tak a ni tih sawiin, hlawhtling taka kalpui a nih theihna’n a tih theihah a tlanchhe dawn lo tih a buat-saihtute hnenah a hrilh.
Serchhip Boxing chuan 42nd Assam Rifles thawhpuiin, Colonel Vikash chuan boxer tha an chhinchhiah zui dawn tih a sawi a, Assam Rifles-a an luh theih dan tur an ngaihtuah dawn bakah training tha zawk an neih zui theihna tur an dapsak dawn tih a sawi.
Boxing Hall-ah Serchhip pawn atanga championship-a tel turte thlentir an ni dawn a, ei leh in tumsak vek tur ni mah se mutbu leh mimal mamawh erawh an intum a ngai ve thung ang.