Mahindra Thar Roxx lei hmasa berin vbc 1.31-in a lei

Mahindra Thar Roxx lei hmasa berin vbc 1.31-in a lei
Thar Roxx nei hmasa ber chu Aakash Minda niin, ani hian charity atana Thar Roxx an lilam chu cheng vaibelchhe 1.31-in a lei a, Thar Roxx VIN No: 001 a dawng ta a ni. Aakash hi 2020-a Thar 3-Door an hralh chhuah hmasak ber pawh kha a lei tawh a, hei hi an lilam tho a ni. Thar Roxx hmasa ber an hralhna hi Naandi Foundation-ah an chhung lut dawn a, an lilamnaa chhang huai berin a chhanna ang zat hi Mahindra pawhin charity-ah hian an thawh ve dawn bawk a ni.
Mahindra Thar Roxx hmasa ber (VIN No: 001) hi September ni 15 leh ni 16 khan an lilam a, a chhang huai ber hnenah Mahindra hian an hlan ta a ni. Aakash Minda hian Tar 3-Door VIN 001 pawh a garage-ah a lo hung vang tawh bawk.
Thar Roxx an lilam, VIN 001 hi a model sang ber AX7L Diesel automatic 4×4 a ni a, Aakash Minda hian Nebula Blue rawng a thlang a, hei hi October ni 8 khan New Delhi-ah an hlan ta a ni. Aakash hian charity atan Naandi Foundation hi a thlan avangin Mahindra pawhin Thar Roxx hmasa ber an hralhna bakah, an hralhna man ang zat chiah hi Naandi Foundation-ah tho hian charity atan an chhung lut ve dawn a ni.
Lilamna hi September ni 15 tlai lam dar 5 atanga tanin, September ni 16, zan dar 7-ah an khar a, Rs 25,00,000 aia tlawma chhan theih a ni lo va, hei hi a reserve price a ni a, a chhang huai ber-in a dawng ta a ni.
2020-a Mahindra-in Thar 3-Door hmasa ber an lilam khan cheng vaibelchhe 1.11-in an hralh a, a leitu hi Aakas Minda tho hi niin, hemi tum hi chuan an lirthei hralhna man leh chutiang zat tho company sum chu COVID-19 relief atan an thawh ve thung a ni.
Thar Roxx AX7L Diesel automatic 4×4 hi Thar Roxx zinga model sang ber niin, a man pangngai chu showroom-ah Rs 22,49,000 a ni ang. Mahindra hian Thar Roxx hi October ni 3 khan booking an hawng a, October ni 12 atangin an hralh chhuak tan ang.