Mahni awmna sawrkar dan
tha taka zawm turin ngen
Rorelna pakhat hnuaia Zofate kan la awm hma chuan mahni awmna theuh, min awptu sawrkar dan leh dun tha taka zawm tlan a ngai tih Zo Reunification Organisation chuan an sawi.
ZORO Gen. Hqrs. thuchhuak chuan Zofate chu khawvel ram sawrkar hrang hrang hnuaia awm, kan awmna theuh sawrkar kalphung pawh inang lo a ni tih sawiin, ‘Zofate hi ram khata kan awm theih nan United Nations Organisation thlengin hma kan lo la tawh thin a. A hlawhtlinna kan la hmu thei mai loa, Zofate hi rorelna pakhat hnuaia kan la awm hma chuan mahni awmna theuh min awptu sawrkar dan leh hrai tha taka kan zawm tlan a ngai a, kan awmna sawrkar dan leh hrai inzahsak tawn chungin lungrual tak leh inpumkhat takin a awm ho theih a ni,’ a ti.
Tunlaia social media hrang hranga Zofate inlungrualna leh inpumkhatna a tha lo zawnga nghawng thei tawngkam mawi lo tak tak a tam chu pawi a tih thu ZORO hian a sawi a. Zofate inpumkhatna leh inlungrualna tichhe zawnga tawngkam mawi lo tak tak hmang lo turin khawvel hmun hrang hranga awm Zofate a ngen tih a sawi.
Manipur-a Zofaten harsatna nasa tak tawkin, Kristiante biak in thlenga tihchhiat sak an ni chu pawi a tih thu ZORO hian a sawi bawk a. ‘Pathian biak in intihchhiat sak hi sakhaw zalenna inpalzutnaah kan ngai a. Zofate chungah hetiang hi thleng tawh lo se kan duh hle a, kan dem takzet a ni,’ a ti.
Mahni awmna sawrkar dan tha taka zawm turin ngen
Get real time updates directly on you device, subscribe now.
Next Post