Mahni fanu zuar thintu court-in kum 12 chhung tang turin hrem
Mahni fanu zuar thintu court-in
kum 12 chhung tang turin hrem
Mahni fanu nawhchi zawrh luihtirtu nu pakhat chu court-in kum 12 chhung jail tang turin a hrem a. Sumfai chawi tura a tih chu a pe thei lo a nih chuan thla 6 dang a tan belh ang.
Thudawn danin, nu pakhatin a tunu hmeichhe kumtling lo chu amah duhthu reng pawh niloin mipa hnenah a taksa zawrhtir thin a ni tih hria in Kawnpui Police Station-ah FIR a thehlut a. First information report-a a lan danin, January 2023 leh 2024 July inkar khan Kawnpui nu pakhat chuan pawisa leh zu a duh avangin a fanu hi a taksa a zawrh tir thin a; FIR hi 2024 August 5 khan thehluh a ni.
Police-in an chhuizuinaah a tuartu hmeichhe kumtling lo hringtu nu hian mi pakhat, hnamdang thurualpuiin hetiang hian a fanu hi an lo zuar thin a, hnamdang truck driver leh rel kawng siamtu hnamdangte chu a dawrtu niin, mi pakhatah Rs.500 leh zu in tur hlawhin a lo inzawrh luih tir thin a ni. He thil hi tum engemawzat a thleng nia hriat a ni a, an zawrhna hmun hi Kawnpui ram chhung, Kutbul ram vel leh New Khamrang vel nia sawi a ni.
He thubuai hi an chhuifiah hnuah police hian Kolasib District Court-ah chargesheet an thehlut a. Thubuai hi Fast Track Court chuan relin, thuhretu mi 7 thu zawhfiah an ni. Thuhretu (witness) zingah hian hmeichhe tleirawl pawh hi a tel a. Evidence dang – doctor report, FIR thehluttu thusawi, thubuai chhuitu police officer leh amah puibawmtute thusawi chu thu rintlak ngei vek nia ngaiin thilsual titua puh hi Fast Track Court judge R Vanlalena chuan thiamloh chantirin jail tang turin a ti.
2026 August 6 khan court hian hremna tur a tichhuak zui a. Thilsual titu hi BNS Section 96 hnuaiah kum 5 chhung jail tang turin, BNS Section 98 hnuaiah kum 5 bawk jail tang tur leh, kum tlinglo hnena ruihtheih thil – zu a in luihtir thin avangin thilsual titu hi Section 77 of JJ Act hnuaiah kum hnih jail tang turin a ti a. Jail tan hun tur lakkhawmin a vaia a tan hun tur chu kum 12 a ni a, sumfai Rs. 15000 chawi turin a ti bawk. Sum chawi tur hi a pe duh lo emaw a nei lo emaw a nih chuan thla 6 dang a tan belh dawn.
Hetihlai hian he thubuaia man tel ve Indra Bahadur Bandhari Chhetri, Kawnpui Kutbul ram vela awm thin erawh thubuai rel lai, 2025 February 3 khan a thih avangin a lakah thubuai kalpui zui theih a ni lo.