Mahni inhaivur tumte tan Congress nih a rem tawh lo – Lal Thanzara

Mahni inhaivur tumte tan Congress party mi nih a rem tawh lo tih an party president Lal Thanzara chuan a sawi.
Sinlung Hills Council huamchhunga Suangpuilawn leh Vanbawng biala Congress party mite hnena SHC inthlana theihtawp an chhuah avanga lawmthu sawia kal MPCC president hian Congress a sawrkar leh a nih chuan mahni inhaivur tumte tan Congress nih a rem tawh loa,mipui rawngbawl tura thlan an nih angin, an sawrkar leh a nih chuan mipui rawngbawl turin hma an la dawn tih a sawi a ni.
ZPM chu hmanni lawka sawrkar an nih avangin sawichhiat chu an tih tur ni lo mah se, inthlan hmaa an intiamna anga an kal loh avangin sawichhuah chu opposition an nih anga an mawhphurhna a ni thung tih Congress hruaitu hian a sawi. Mini leh small hydel project chu Vai mihausa kuta hlan an tum mek a; kan airport neihchhun Indian Air Force kuta hlan an tum a, Chaltlanga Tourist Lodge pawh Vai mihausa kuta hlanin five star hotel siam an tum mek, tiin a sawi.
MNF tih pamtul tak Referral Hospital chu Congress sawrkarin hospital changtlung taka an siam bakah harsa taka medical college an din chu sawrkar laipui kuta hlan an tum bawk, tiin, “Hetianga kan ram rohlu thehthang tum mekte lak atang hian kan ram hian chhanchhuah a mamawh,” a ti.
Vanbawngah chhungkaw 18-in NLUP atanga bul tana sial 180 chuang an vulh mek leh chhungkaw engemawzatin NLUP hmanga leilet an la enkawl mek thu MPCC president hian sawiin, NLUP-in thingtlang mipui lung a len a, Congress a sawrkar chuan an kalpui leh ngei a ring tih a sawi a ni.