Mahni ram humhalh zo lo nih hi a zahawm lo – Lalrindika Ralte

Mahni ram humhalh zo lo nih hi
a zahawm lo – Lalrindika Ralte
Mahni ram humhalh zo lo nih chu a zahawm lo a, humhim tura beih zel a ngai tih MLA Lalrindika Ralte chuan a sawi.
Zirtawpni khan Langkaih Group YMA Conference vawi 40-na Bungthuamah hman a ni a. He hun hmanpuitu Hachhek bialtu MLA Lalrindika Ralte chuan ram leh hnam humhalh tumtute ngaihtuahna chu a dikin a chhuanawm a, a pen chhuak tur dik tak YMA a penchhuak chu lawmawm a tih thu a sawi. “Mahni ram humhalh thei lo leh humhim zo lo nih hi a dik loa, a zahawm lo. Ram leh hnam humhim turin theihtawpin kan bei zel anga, kan hlawhchham loang,” a ti.
Khawthlang bial atangin world class ngaihtuahna put theih a ni, tiin, “Mi ropui tak kan ni lo maithei, miin min ngaisang lo a ni maithei. Mahse Pathianin mitin hi midang aia nep bikin a siam loa, midang aia mibik nihna min pe theuh. Kan ngaihtuahna a dik phawt chuan engmah a huphurhawm loh. Thil awlsam a awm loa, thil huphurhawm a awm lo. Hlawhtling tura huaisen leh rilru dik put a tul,” a ti.
MLA inthlan turah a tan a campaign dawn loa, bial mipui tan a campaign dawn tih Hachhek bialtu hian a sawi. Politics chu kan hrilhfiah kual lutuk thin vangin a tak chang lo thu a tam lutuk tih a sawi. “Kum 4 MLA ka ni ve tawh a, in hriat tur ang ka ni tawh. Ka that loh chuan a tha thlan mai tur. Western ramte an ngaihtuahna a changkang an ti thin. Western Mizoramah kan cheng a, he bial ngaihtuahna hi a changkang tur a ni. He bial hian politics tha kan chhawpchhuak zel anga, kan beisei ram hmasawnna chu kan hmu ang,” a ti.
Langkaih Group YMA Conference vantlang inkhawmah hian Central YMA asst. secretary Prof. Malsawmliana’n “Ram leh hnam humhalh” tih thupui hmangin thu a sawi bawk a. Mi harsate pual thawhlawm khawn a nih bakah intihsiak a ni.