Mak leh ropui taka ngamtu Inter Milan

Thawhlehni zan khan UEFA Champions League semi-final thawhhnihna khelh a ni a, San Siro-a inkhel hmuhnawm takah mualneitu Inter Milan in mak, mawi leh ropui takin FC Barcelona an hneh a, final an lut. Barcelona hnawtchhuaktu Inter hian Paris St Germain leh Arsenal te inkhela chak zawk zawk final-ah an hmachhawn zui leh ang.
Inter Milan leh FC Barcelona te hi semi-final thawhkhatnaah 3-3 ngawtin an lo inhnehtawk tawh a, inkhel hmuhnawm tak an lo lantir tawh. Semi-final thawh khatnaah hian Barca in ball an chang deuh char char a, Inter Milan in an hun tha neih chhawr tangkaiin goal an thun hmasa zel thung. Second leg-ah pawh thil a danglam tam lova, ball chang tlem zawk Inter in goal an thun tam zawk a, final lut zawkah an tang ta daih a ni.
An mualah ball chang tlem zawk ni mah se Inter Milan hi hlauhawm zawk an ni. An hun tha neih hmasak an chhawr tangkai zo lo mah se goal an thun har lo. An khingpuite tihsual vangin Inter hian hun tha an nei a, Denzel Dumfries siamsak tha zet chu captain Lautaro Martinez chuan awlsam zetin a pet goal a, minute 21-na lekah hmahruaina goal a thun. An mualah goal thun hmasa zawkah an nih vangin Inter an phur a, an khel tha zui viau nghe nghe.
Catalan club lian Barca hian an si phurh sut tum viau mah se an hlawhtling thei mai lova, chesual hmasa zawkah an tang leh. Chawlhlawk dawn hnaihah Lautaro Martinez chuan penalty a hlawhchhuak. He penalty hi Hakan Çalhanoglu chuan minute 45+1-ah awlsam takin a pet goal a, 2-0 a hmahruai chungin chawlhlawk an hmang.
Si hniha hnufual tawh Barcelona in chawlhlawk hnu lamah goal thun ngei tumin tan an khawh. Eric García chuan minute 54-naah chiang zeta hlap goal in an si phurh a sut then. Goal an thun vangin Barca an phur thar a, goal thun tumin an khingpuite an nawr zui nasa hle. Minute 60-naah chiang zeta an khingpui tlarhnung an thiah hnuin Dani Olmo chuan minute 60-naah awlsam takin a tauh goal a, an si phurh a sut zo ta nge nge.
2-2 a nih hnuin inkhel a hmuhnawm zui viau a, goal thun tumin an innawr tawn nasa hle. Hun tawp dawn hnaih minute 87-naah Raphinha chuan fuh zetin Barca hmahruai letna goal a thun. Hun tawp dawn tepah ball chang tam zawk Barcelona in goal an thun vangin Inter Milan hi an mualah ngei tlawmin, tla ngei tura ngaih an ni hman. Mah se, an dinhmun chhe viau tawh mah se Italian champion hian tlawm mai an tum awzawng lo. Hun tawp rat thlengin an khingpuite an nawr a, an vannei leh ta nge nge. Barcelona tlarhnung chet fuh tawk loh vangin hun tha an hmu hlauh. Taremi siamsak tha thawkhat tak mai chu bench atanga lut Francesco Acerbi chuan near podt-ah fuh zet maiin a pet goal a, minute 90+3-ah an si phurh a sut. Acerbi goal thun vangin thi tawh ang hiala ngaih Inter Milan an thochhuak leh.
Hun pangngaiah 3-3 a nih vangin minute 30 dang ennawn an chhuah belh leh. Mak taka tlawm an pumpelh vangin Inter Milan an phur a, an insingtawk viau bawk. Chak ngei tuma tan khawh Inter Milan tan hian Davide Frattesi chuan minute 99-naah fuh zetin a pet goal a, hma an hruai letna goal a thun.
Barcelona an hnufual thar leh vangin inkhel a hmuhnawm zui hle. La Liga club lian Barca hian an si phurh sut ngei tumin thapui an thawh a, hlauhawm pawh an siam malh malh. Rawlthar hmuhnawm Lamine Yamal chuan an khingpuite a chhaihbuai fo va, goal thun theihna hun tha nei bawk thin mah se Yamal hian si nghak chetha tak Yan Sommer a paltlang thei lova, goal post a petper dawp bawk. Bench atanga lut Robert Lewandoki pawhin hun tha nei bawk mah se a chhawr tangkai zo bik lo. Hun tawp thlengin Barca hian an si phurh an sut thei tawh lo. Ke khing khata final rap hman thuak kha si belhkhawmah 7-6 in an tlawm a, uiawm takin an tla a, Champions League atangin an puanthhuah an tel zui ta a ni.
An mualah ngei mak, mawi leh ropui taka Barcelona an lehthal hi Italian club lian Inter Milan tan hnehna hlu, mak leh ropui danglam tak mai a ni a. Khawvel awmchhunin an hre reng tawh ang.