Malaysia in visa-free kalpui veleh

Malaysia chuan December 1 atangin Indian leh Chinese khua leh tui te tan ni 30 daih visa-free a pe tawh dawn tiin Prime Minister Anwar Ibrahim chuan a sawi a. Tun hnai lawkah Thailand leh Sri Lanka te pawhin tourism tihhmasawn nan foreigner te free-visa a lo pe tawh bawk.
Ibrahim chuan visa free an kalpui chu a hmaa Gulf ram te leh West Asian ram Turkey leh Jordan te laka an kalpui belhna a ni tiin a sawi bawk.
“Malaysia tlawh turte sreening neih vek a ni ang a, security chu thil dang daih a ni thung. Criminal records an nei emaw firfiakna lam nena inkaihhnawihna nei te chu Malaysia an luh remtih a ni lovang” tiin Prime Minister chuan a sawi bawk.
30-day visa-free entry hi ASEAN ram te social, tourism leh business thila Malaysia tlawh turte tan kalpui a ni sa bawk.
Malaysia hian khualzin 16.1 million neih tumin hma a la a, chuta tang chuan RM 49.3 billion a lakluh theih a beisei a ni. India chu Malaysia tlawhtu tam ber ram a ni bawk.
Kum 2022 khan Malaysia tlawh Indian tourist 3,24,548 an awm a, kum 2023 first quarter ah Indians 1,64,566 ten an tlawh der tawh niin Malaysia Tourism Promtion Board, Tourism Malaysia tia hriat lar te chuan an sawi.
India leh Malaysia inkartawnin kartin thlawhna 158 a thlawk ziah bawk a. Chungah chuan seat 30,032 awmin Malaysia Airlines, Batik Air, AirAsia leh Indigo te an thlawk a ni.