MALSAWMNA PHENA TUARNA!

Zoremi Hmar Zote

Tun kar kan hman lai hi ‘Kangmei ven hapta’ a ni a. Thawhtanni khan district hrang hrangah bul tanna hun hman a ni. Thil pawimawh, ram hnuk khawih a nih avangin he hun hi a hlu hlein ka hria. Thingtlang lam tan loh theih lohva lo neih a la ngaih avangin lo an hâl lo thei lo va, chu mah tih nâk alaia a tul lo thlenga kan tikang mai thin hi inven a, infuih thar fo a tha e.
Hmasawnna leh changkanna a lo thlen hian lawmawm viau mah se kawng lehlamah nghawng tha lo a nei ve zel duh khawp mai. Kawngpui tha neih dawn chuan thing leh mauin an tuar a ngai a, mihring thiamnain ‘khâwl’ a la hmuh chhuah hma khan khawsak harsa deuh mah se boruak a la thianghlim thung. Lirthei hmuh chhuah a nih hnu hian khawsak a awlsamin a zangkhai a, mahse accident avanga thihna leh boruak bawlhhlawh a rawn keng leh bawk si. Malsawmna phena tuarna hi kawng tam takah a awm thei awm e.
Kut hna thawktute hnena a intiam ang ngeiin kan sawrkar chuan Sawhthing rate a siam ta a, a leisak ngei bawk dawn e. Hetianga kan kal chho zel a nih chuan thingtlang lam mi tan kawl êngin changkannain a umzui ngei ngei dawn a, hah man têlin lawm takin bianga thlantui luang an nûl tawh ang. Mahse kum tin ram thar kan vât duai duai chho zel a nih chuan kan ramngaw dur pui pui leh kan lui dung leh a chhunga nungcha ten an tuar chho dawn tlat a ni, hei hi engtia tih chi nge?! A hma kuma Sawhthing kan lo chinna ram kha hman nawn leh dan a awm em, khur te siama leitha nena tan kawpa Sawhthing hi lin nawn chi a ni ang em?!
Ngun taka han ngaihtuah vang vang hian, phâi sangha mamawh lo tur khawp lui hi, Pathian hian Zofate hi min pe niin ka hria. Pawi ta bera chu thu hnu dâwn lo reng reng, nakin hun ngaihtuah miah lo. ‘Dàwn tâwi suihlungmawl’ kan tam em avang hian kan luidung nungchate hi an rêm duak duak mai a, a finga te pawh kan fin a tlâi hman lek lek chu a ni ber e. Luiah tûr an han phul a, sangha man tum khan man an tum loh thleng thlengin an tihlum a, thil nung reng reng, kha luia awm tawh phawt kha chu an thi vek zel mai si a. Kan luite pawh a pâtek zo va, ei faitu sangha leh luia chêng nungcha awm ta lo chu, an tawp hma bik em em mai a ni. Tlâi khat sangha hmeh châk vanga tûr hmang hreh lo khan, ama hrawk mai bakah Zofate hrawk a hrêk tel tih a hre lo nge a pawisa lo; ka haw riau a nia. Hei pawh hi malsawmna kan dawn phena tuarna kan insiam chawp ni berin ka hria.
Lui kan han kal a, lui tui fim kar maiah Lêngphar rual lo tla sap sap mai te, nghalim, nghazawngêk ten lung bàl an lo tlàn sap sap mai han hmuh te hi a nuam em em a, kan upate, kan pasalthate phei chuan, “Nghal mal thanga awh ai chuan, Bâwng dawha sangha lo tla vâr uárh hian mi a tiphûr zawk e,” an lo ti hial thin a ni.
Kan luidung te, thing leh mâu, nungchate hian inzawmna an nei vek a, a pawimawh ber keini mihringte phei hi chu an tel lova nung thei lo kan nih kan hre vek. Mizote chauh hi kan ni em ka hre law, kan kut hi a hlei em em mai a. Ramhnuaiah han kal ila, kan tana hnawk em em pawh ni lo, kan pawi sawia min lo vaw zuk zuk pawh ni hlei lo, thing leh mâu kan han hlâwi thlazen hi chu thil tul lo tawp a ni. A thar lo to va, lo thang lian leh tur chuan kum tam a mamawh tawh thin si a, insum hram hram a ngai a ni. Kan lui hnâr chawmtu thing leh mau hi, kan humhalh hram hram a ngai.
Tin, hei Mizote hian Rawtuai hi kan ngaina em em mai a, ramvakmi ten Rawtuai khawrh tur a awm vat theih na’n ti a, ram an han hâl ngawt thin te hi thil âtthlak tak a ni. A thar a hunah chuan a rawn thar mai dawn a, lo nghak ve mai se la. Rawtuai thar hma vanga hausa ta hluai hi an awm pawh ka ring chiah lo. Ram hàl ngawt mai hian thing leh mau mai bakah nungcha tam tak a tihlum a, loh theih lohva Lo atana kan vât a, kan hàl mah tih tawh nak alaiin. Rawtuai vang lo pawhin, kut hlei hrim hrim vanga ram hâl duh mi mawl uchuak pawh kan la awm, hei pawh hi a YMA ang zawngin emaw, nasa zawka kan la inzirtir a ngaiin a lang e.
Kan ram, kan neihchhun liau liauah hian, nakin lawkah chuan min châwi veltu ‘Lèntupui’ te kan la nei lo ang a, ‘Tuk loh ram dài’ kan tih meuh pawh hi a la ro bum mai ang tih a hlauhawm deuh roh asin. Zin chhuah nikhuaah khua kan han pêl a, thing leh mâu zîng khup mai kâra Tlaizawng lo pâr suau suau te, va tinreng hlim chiar ri ngaithla chunga boruak dai nuam em em mai, ram rim nam chék han hip vàng váng te hian dam an ti manhla a. Khua a lo thâl a, Fartuah leh Vaube, inchawih nalh em em maia an han vul dun te hi mit pahnih aia tam neih châkawm khawpin thlir man an awm thin. Thing leh mau humhalh ila, kan luidung duat ila, malsawmna phêna tuarna tinêp zel turin tan i la theuh ang u. Tichuan ‘Hei aia ram nuam hi awm ve tak ang maw!’ tiin, kan la zâi thle leh bàwng báwng dawn zu nia.