Mamit naupang thattu in hursualna lamin khawih tum

Tunhnaia Mamit naupang thattu chuan police-te hmaah hursualna lam zawnga khawih a tum tih a sawi.
Kumin August 18 zing dar 8.00 vel khan Francis Lalremruata (11) s/o James Lalchhanhima, Mamit High School Veng chu chin hriat lohin a bo a. Police-ah FIR thehluh niin police-te bakah khawtlangin an zawng a, August 23 chawhma dar 11.30 khan naupang bo ruang hi Mamit leh Bawngva kawng hluiah luang leh thang karah hmuh a ni.
Ruang hi saruak veka awmin, a lo chhe tan tawh a. A ruang awm dan a rinhlelhawm avangin a zirchiang turin Aizawl atangin forensic expert-te kalin post mortem examination neih a ni.
Mamit Police Station-ah thubuai ziahluh niin chhui zui a ni a. R Lalrinchhana (20), Mamit High School Veng chuan Francis Lalremruata hi August 17 zan khan Nghaka Motor Works Mamit chhungah hursualna kaihhnawiha a thah a nih thu a inpuang a ni. Finfiahna leh thildanga a inpuana behchhan hian man a ni a. August 26 khan court-a hruai niin Central Jail-a dahluh a ni.
Hemi chungchanga The Aizawl Post thudawn hmasaah chuan, police hotute zawhnaah pawikhawihtu hian hursualna lam hawiin a khawih lo nia hriat a ni a, hemi hnuaiah hian thubuai pawh siamsak ni lo angin tarlan a ni a. August 29-a police thuchhuakah hursualna lam hawiha khawih tum a nih thu hi tarlan a ni.
Hetihlai hian Mamit Chhimveng All NGO leh Village Council huaihawtin Thawhlehni khan Mamit Hmunsam Tlang atangin Field Veng thleng naupang thah duh lohna kawng zawh neih a ni a. Lalremruata thattu chu a phu tawk hremna pe tur leh, hetiang thil hi an khawtlanga thleng tawh lo se an duh thu te an aupui a ni.
Resolution siamin, Lalremruata rawng taka thattu R Lalrinchhana chu dam chhungin Mamit Chhimveng huamchhunga rap tawh lo turin an ti a. R Lalrinchhana’n tual a thah chhan nia sawi danah an lungawi tawk lo tih sawiin, hei aia chiang zawka hriat a nih theih nan chhui turin an phut tih a sawi.