Manchester City – an dai chin apiang an ram

Manchester City – an dai chin apiang an ram
Inrinni zanah second half tir lama Rodri an hnawhchhuahsak chungin Manchester City chuan Etihad Stadium mikhual Nottingham Forest lakah 2-0 hnehna changin Premier League season kal laia club paruk an tum tawhte la hneh fai vekin, point 18 nen an hmahruaina an sawhnghet zel.
City tan goal khungtu an pung a, minute sarihna leka goal hmahruai thawhtu Phil Foden tan tun kha tualchhung league season kal laia a goal khatna niin, season liamta khan league goal 11 a puitlin a, kumin hian season kalta kha a pha dawn nge dawn lo sawi a la harsa rih ang.
Minute 14 an chuangkai a, tunhnai Europe-a goal khung zo lo Erling Haaland chuan tualchhungah a theihna lantir chunzawmin sihnih faia mualneitu team hmahruaina leh chakna ni zui ta a thawh ve leh.
Second half tan atanga second 27-ah game kalphung tidanglam dawrh turin City player Rodri chu straight red hmanga hnawhchhuah a ni a; corner flag bul Morgan Gibbs-White hrawka a reh avangin referee Anthony Taylor chuan chhuahna thupek a tichhuak a, hun a la awm bawk a, Forest an phur thar.
Second half chu thawnthu dang daihah a chhuak ta a, City lamin an hmahruaina hum hram tumin theihtawp an chhuah a, Forest lamin a tam zawk an nih hre ran chungin an nawr thung a; clear chance han tih tur erawh mikhual team khan an ngah lo a, Orel Mangala chuan goal kham chungah a hlawi chhuak a, Taiwo Awoniyi chuan hnai tak atangin goal ban sirah a petchhuak a, hun tawp dawnah Ederson chuan Anthony Elanga goal tur a dansak bawk han tih angte kha Forest beiseina neihchhunte chu an ni deuh mai.
Hun tawp dawnah boruak a lum zual a, Pedri hnawhchhuah a nih chung-changa Taylor laka lawm lo City manager Pep Guardiola leh home fans an sa hulh a, mahse, vawiruk khelha vawiruk chak an kaltlangpui ta tho a ni.
A career-a red card nena sawizawm ni ngai zen zen lo kum 27 mi Rodri tan tun kha Premier League bika red card a hmuh vawikhatna niin, tunhnai season li liamta chhung khan Spain international hi City-a midfield-a mi pawimawh ni chho ngar ngar mah se hnawhchhuah tawk zawngin a khawsa ngai lo a, chu chuan a inthununna pawh a lantir awm e.
Nizan result tarlan hman lohah top four dang zawng an chechhuak ve leh a; an result tarlan tur a awm hmain defending champion City hian table-ah point ngain hma an hruaifal.
Burnley 0-1 Manchester United
Kumin January thla hnu lama league away goal a thun vawikhatnaah Bruno Fernandes chuan a team chakpuiin, inelna hrang hranga a zawna vawithum an tlawmna atangin a team a khaichhuak.
Turf Moor-a goal awmchhun hi chawlhlawk hma chiah minute 45-a captain Fernandes-a tihluh hi niin, Jonny Evans-a siamsak niin, tun season league game vawiruk an khelha United vawithum chakna chiah a ni!
Mualneitu Vincent Kompany team erawh point khat hum chungin table mawngphahah an thu chhunzawm zel.
Everton chuan season thar league-a an chak vawikhatna nghakchhuak ve thungin, home-a talbuai rei tawh Brentford mualah 3-1 hnehna an chang nawlh.
Luton Town chuan player red card hmu neitu Wolverhampton Wanderers chu 1-1-in an draw thei hram a; Crystal Palace leh Fulham pawh goal thun loin Selhurst Park-ah an inhnehtawk ve bawk.