Manchester City in tlawm an pumpelh

May 9, Thawhleh zan khan UEFA Champions League semi-final khelh tan a ni a. Santiago Bernabeu-a lenglut Manchester City chuan champion lai Real Madrid lakah tlawm an pumpelh. Mimuala tlawm pumpelh City hi an muala inlan zui leh tur an nih vangin final lut tura rinkai zawk an ni.
Khelmual ropui Santiago Bernabeu-a lenglut Manchester City hian Real Madrid lakah bul an tan tha a, ball chang tam zawk leh hlauhawm zawk an ni nghal. Hun tha an hlah zawn hnuin Real Madrid chu goal thun hmasa zawkah an tang thung. Vinicius Junior goal turu zet mai chu Kevin de Bruyne goal ropui hmangin City in an sut. He inkhela goal lut pahnihte hi a tha dun hle.
Premier League champion City hian season liam ta UCL Semi-final-a an ngam loh Real Madrid lakah bul an tan tha a, inkhel tan atanga rei loah Kevin de Bruyne chuan goal thun theihna hun tha a neih a, a shot tha tak chu Belgium tana a khelhpui Thibaut Courtois-a’n a lo dansak a. Si nghak tha tak Courtois hian Rodri pet kawh zet mai a dan bakah Erling Braut Haaland pet leh tauh a dang bawk.
Champion tura rinkai Manchester City lakah bul tan tha lo mah se Real Madrid an khel tha tulh tulh a. Champions League club ropui hian an ropuizia an lan nawntir leh a, Real Madrid chu Real Madrid tih lantir nawn leh turin goal thun hmasa zawkah an tang. Real Madrid player Luka Modric, Eduardo Camavinga leh Vinicius Junior ten mawi leh fuh taka ball an inpek tawn hnuin Brazil forward Vinicius Junior chuan minute 36-naah fing leh tha zetin a pet goal a, hmahruaina goal a thun.
An mualah goal thun hmasa zawk an nih vangin champion lai hian inrintawkna sang zawk an nei thar a, goal thun belh tumin an mikhualte an nawr a, ball an chang tam bakah goal hmaa hriam zawk an nihzia an lantir. Carlo Ancelotti team te hian fuh taka City an nawr tlang hnuin Karim Vinicius Junior chuan tha zetin a cross lut a. Benzema tan pet goal nuam tawk chauha kal tur hi defender Pedri chuan a lo dang hman hlauh a, an team a chhanhim. Chawlhlawk dawn hnaihah Benzema hian hlauhawm nei nawn leh mah se handball vangin Benzema chuan a hun tha ho lam takin a khawhral ve bawk. Chawlhlawk hmain goal dang a luh belh thei tawh lova, Real Madrid chuan si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thun tuma an innawr tawn a hmuhnawm thei hle. Tihsual hlek neih a pawiin, ball chang zawkin hlauhawmah an chantir thei zel a, game a inbuk tawk chho hle. Mipui sing tam takin an auh phur Real Madrid an khel tha chho viau a, goal hmaa hriam zawk, chance insiam thiam zawk an nih vangin hlauhawm an siam fo. La Liga club lian hian an mikhualte an nawr bet a, corner an hmu zawn zawt zawt. City an him hram hram a, goal an chhuah belh em lo a nih mai rih.
Real in an nawr em vanga goal chhuah belh ngei tura ngaih City hian fuh zetin an khingpuite an nawr tlang. Jack Grealish, Ilkay Gundogan leh Kevin de Bruyne ten fuh taka ball an inpek tawn hnuin De Bruyne chuan box pawn atangin kawh zetin a pet goal a, minute 67-naah an si phurh a sut. Kevin de Bruyne hian City tan champions league knockout stages-ah vawi 14 a khel tawh a, goal 11 zet thunin a chetha hle.
City goal luh nan ball an chan tantirhna hi Real Madrid manager Carlo Ancelotti chuan a out hman ngeiah ngaiin referee hnenah a complaint chiam a. Complaint-a a tan nat lutuk vangin yellow card a hmu hial nghe nghe. Hemi tuma ball out leh out lo chungchang hian inhnialna a chawkchhuak tam zui hle a. Real Madid tantuten out ngei niin ngai bawk mah se VAR hmanga en let ngai thil a ni lo nia ngaih a ni thung.
1-1 a nih hnuin City chu phur zawkah an tang a, an goal thun khawl Erling Haaland chuan hun tha nei bawk mahse Alaba chuan tha zetin alo block a, hlauhawm a chang zo lo. Hun tawp dawn hnaihah Aurelien Tchouameni chuan kawh mar tha zetin a pet a, goal mai tura ngaih a nih laiin si nghak Ederson chuan fuh zetin a lo dansak a, City a chhanhim. Ti chuan inkhel hmuhnawm tak chu a tawp a, 1-1 in an inhnehtawk zui ta a ni.
Etihad Stadium-ah final – Guardiola
Santiago Bernabeu-a inkhel hmuhnawm takah 1-1 a an inhnehtawk hnuin Etihad Stadium-ah second leg khelh a ni dawn. Manchester City manager Pep Guardiola chuan an muala final khel tur an nih thu a sawi a, final luh tuma tan an khawh tur thu a sawi.
Guardiola hian Real Madrid nen first leg an khel chu game inbuk tawk tak a nih thu a sawi a. “Khel tha zawk kan nih laiin goal an thun a. An khelh that lai takin goal kan thun ve thung. Game inbuk tawk tak mai a ni a, kan chak lo pawh result chhia a ni lem love” a ti.
Champions League semi-final thawh hnihna hi kar leh nilai zanah Etihad Stadium-ah khelh a ni dawn a. Season liam taa an paltlang zawh loh Real Madrid paltlangin City hian final luh ngei an tum dawn a. Real Madrid an paltlang thei a nih chuan AC Milan leh Inter Milan te inkhela chak zawk zawk an hmachhawn dawn vangin champion theihna hun tha tak an nei zui thei dawn a ni. La Liga club lian Real Madrid hian season liam taa an tlawm tawhna Etihad Stadium-ah ngei chak in, champion nawn leh turin final luh ngei an tum ve bawk ang.
Champions League-ah hian away goal tih bo a ni tawh a. Etihad Stadium-ah second leg khelh turah hian goal thun tam zawk zawkin final an lut ang