Manchester Cityin final an lut

Nilai zan khan UEFA Champions League semi-final khelh zawh a ni a. Etihad Stadium-a inkhel hmuhnawm takah Manchester City chuan si li fai ngawtin Real Madrid an sawp a, si belhkhawmah 5-1 a hnehna changin final an lut a. Champions League final hi June ni 10-ah khelh a ni dawn a. Manchester City leh Inter Milan an inhmachhawn dawn a, City tan a vawi khat nan UCL-ah champion theihna hun tha zau takin a inhawnga ngaih a ni.
Premier League champion City hian ni danga an ngam loh thin Real Madrid hneha final luh ngei tumin an mualah tan an khawh a, inkhel tan phat atangin an mikhualte an nawr tawm nghal hle. Etihad Stadium-a inkhel pumpuiah champions league-a vawi 14 zet champion tawh Real Madrid an bet tluan zak a. Si nghak Thibaut Courtois chetthat zarah goal li aia tam an chhuah lo kha Real Madrid tan lawmna tham a tling ang.
Santiago Bernabeu-a tlawm pumpelh City hian an mualah chak an tumruh hle a, champion lai Real Madrid an nawr bet nghal. Inkhel tan tirh lamah EPL leh UCL-a top-scorer ni mek Erling Braut Haaland an hlauhawm nghal viau a, a tauh goal ngei tura ngaih tawh chu si nghak Thibaut Courtois chuan vanneihthlak takin a dan sak. Haaland hian hlauhawm siam nawn leh mah se goal a thawkchhuak thei chuang lo a, Real Madrid an him rih.
Si nghak chetthat vangin him hram hram rih mah se champion lai Real Madrid an him reng thei lo. City hian fuh taka ball an inpek kual hnuin chiang zetin Real Madrid tlarhnung an that a. Kevin de Bruyne ball pek fing tak dawngtu Bernardo Silva chuan near post-ah chiang zetin a pet goal a, hmahruaina goal a thun.
Hmahruaina goal an thun vangin City an phur leh zual a, na zawkin an mikhualte an nawr chhunzawm. City an phur viau laiin Real Madrid an che fuh hleithei meuh lo va, an player pawimawh ten ball an hloh fo thung. Mualneitu City hian na taka an nawr rah an seng a, chawlhlawk hmain goal dang an thun belh leh. Minute 37-naah si nghak Courtois chuan tha takin dang bawk mah se ball per let chu goal hmahruai thuntu Bernardo Silva chuan awlsam takin a tauh goal a, an goal hnihna a thun. Chawlhlawk hmain goal dang a luh belh thei lova, City hian si hnih faia hmahruai chungin chawlhlawk an hmang.
Chawlhlawk hnu lamah Real Madrid an khel tha hret a, long range shot hlauhawm tak neiin an khingpuite an tihthat zauh thin a. Ciry tlarhnung inrem phui tak erawh an thiat hleithei meuh lo thung a, clear chance an insiamchhuah thei meuh chuang lo. Real in an si phurh sut an mamawh em em laiin goal an chhuah belh leh tlat thung. Minute 76-naah Manuel Akanji tauh tha tak chu defender Eder Militao chuan an lamah a dang pial lut a, City in an goal thuma an thun a, an hmahruaina an tizau leh zual.
Minute 76-naah City in goal an thun belh leh tak vang hian final luh tuma inelna a tawp fela ngaih a ni a, City hi final lut chiang tawha ngaih an ni. Akanji goal thun hnu hian Haaland chuan goal thun theihna hun tha zet mai a nei leh a, hei pawh hi si nghak Thibaut Courtois chuan vanneithlak zetin a lo dang leh tlat a. A chet fuh ni nise hattrick hial siam thei Haaland hian goal a thun loh tluan phah ta a ni.
Haaland hi a vanneih ni a nih loh bakah an chak ngei dawn tih a chian thawkhat tawh vangin manager Pep Guardiola chuan a la chhuak a, Jullian Alvarez a luhtir. World Cup-a Argentina champion puitu Alvarez hian mual chhungah hun rei a hman hmain goal a thun a. Minute 90+1-ah Phil Foden ball pek fing tak chu awlsam takin a pet goal a, an goal lina a thun. Alvarez goal thun hnu hian goal dang a luh belh tawh lova, City chuan 4-0 ngawta sawpin Real Madrid an pet chhuak a, final an lut ta a ni.
Champion lai Real Madrid hnawtchhuak a, Champions League final an luh leh tak vangin Manchester City hi tre-ble champion ni thei dinhmunah an ding mek. Pathianni zan hian Chelsea an hneh a nih chuan City hi EPL champion thar an ni tawh dawn. EPL-ah hian champion ngei tura ngaih an ni a, FA Cup leh Champions League final-ah pawh champion tura rinkai zawk an ni bawk a, tre-ble champion thei dinhmun duhawm takah an ding mek. City hi EPL, UCL leh FA Cup-ah te an champion vek thei a nih chuan Manchester United hnuah EPL club zingah Tre-ble champion leh thei hmasa ber an ni ang.