Manchester United in Barcelona an chelh

Thawhleh leh Nilai zanah Champions League last 16 khelh a nih hnuin, ningani zan khan Europa League last 16 play-off khelh a ni ve thung. Inkhel ngaihven hlawh takah Premier League team lian Manchester United chuan La Liga hmahruaitu FC Barcelona lakah tlawm an pumpelh a, last 16 luh theih beiseina sang zawk an nei thar. Inkhel dangah Serie A club lian Juventus pawhin hnehna an chang zo bik lo.
Spotify Nou Camp-a inhmachhawn Barcelona leh Manchester United te hi tunhnaia khel tha ve ve an ni a. Barcelona hian La Liga-ah point riatin hma an hruai fal mek a, champion turin an dinhmun a tha thawkhat viau. Erik ten Hag hnuaiah bul tan tha lo mahse United hian hma an sawn chak hle a, EPL-ah pathumna an ni hial tawh. Tunhnaia khel tha tluan pahnih an nih vangin an inhnehtawk hle tura ngaih a ni a. Mualneitu Barcelona hi chak tura rinkai zawk ni bawk mahse 2-2 in an inhnehtawk zui ta tho a ni.
Rinlawk ang ngeiin Barcelona leh United hi an inhnehtawk a, inkhel hmuhnawm tak ah lantir. Chawlhlawk hmain goal thun theihna hun tha an nei ve ve a, si nghak Ter Stegen leh David de Gea te an chet that dun em vangin goal a lut lo ve ve thung. United tan hian Weghorst leh Marcus Rashford ten hun tha an neih chu si nghak Ter Stegen-an a tih thlawnsak ve ve. Barca tan Jordi Alba pet tha tak chu David de Gea chuan tha zetin a lo dang ve bawk.
Chawlhlawk hmain goal lut awm thei lo mahse, chawlhlawk hnu lamah goal li ngawt a lut ta thung a, inkhel a hmuhnawm leh zual sauh. Mualneitu Barcelona tan Marcos Alonso chuan tha zetin a tauh lut a, minute 50-na lekah hmahruaina goal a thun. Chelsea defender hlui Alonso tan United lama goal thun hi a lawmawm leh zual viau tura ngaih a ni.
Chak tura rinkai zawk Barca lakah goal chhuah mah se United an buai mai lova, goal hmangin an khingpuite an chhanglet ta thuai zawk. Goal an chhuah atanga minute hnihna lekah Fred ball pek tha tak chu Marcus Rashford chuan box chhungah tha zetin a khalh lut a, angle chep tak karah tha zeta pet lutin an si phurh sutna goal a thun. Rashford hi World Cup hnu lamah a che tha hle a, forward hlauhawm a nihzia chiang zawkin a lantir zui zel.
Goal khat ve ve an thun hnuin Barca an khel tha chhunzawm a, goal an thun belh nghal teuh hle. Leeds United forward hlui Raphinha chuan hlauhawm takin pet mah se De Gea a paltlang zo lo thung. De Gea chet that zar zova an him nawn leh hnuin United an vannei zui nghal. Minute 59-naah short corner an chhawr tangkai. Marcus Rashford ball cross chu captain Bruno Fernandes chuan a lo dek leh zet a, hemi hnu hian Barca defender Jules Koundé chuan an lamah vanduaithlak takin a ti lut a, mikhual team hmahruaina goal a thunsak.
An tual zawlah ngei si an phurh hnuin Barcelona an hmuhnawm zual sauh a, an khingpuite an nawr na zui hle. Minute 76-naah Raphinha chuan mak leh pui ang reng takin goal a thun a, an si phurh a sut. Raphinha hian ding lam sir atangin ball a vawrh lut a, a ball vawrh luh hi Robert Lewandoski chuan khawih tum chungin a khawih thelh a, goal-ah a lut zui ta tho a ni. Tichuan, 2-2 a ni leh ta chiah.
Goal hnih ve ve an thun hnuin team hnihten hun tha an nei tam thei tawh lova, goal thun thei an awm tawh lo. Inkhel hmuhnawm takah 2-2 in an inhnehtawk a, last 16 lut tur zawk tichiang turin kar leh ningani zan khian Barcelona leh Manchester United te hi Old Trafford-ah an inhmachhawn zui leh ang. United manager Erik ten Hag chuan an muala khel tawh tur an nih vangin La Liga hmahruai Barcelona hnehin, Europa League atanga an hnawhchhuah theih a beisei hle.
Juventus chak zo lo
Italian Serie A club lian Juventus chuan an mualah Nantes an mikhual a. An mikhual Nantes hi French Ligue 1 ah 13-na ni mek an nih vangin Juventus hian awlsam takin an hneh thei tura ngaih a ni. An mikhual lakah bul tan tha viau mahse hnehna an chang zo bik lova Nantes nen hian 1-1 in an inhnehtawk ringawt.
Juventus hian an mikhual lakah bul an tan tha viau a, minute 13-na lekah Dusan Vlahovic chuan hmahruaina goal a thun nghal. Hma takah goal thun mahse goal dang an thun belh thei tlat lo thung.Goal an thun belh theih loh an tuar a, goal an chhuah ta hial zawk. Minute 60-naah Nantes tan Ludovic Blas chuan goal thunin an si phurh a sut. Hun tawp thlengin goal dang a luh belh thei tawh lova, Juventus chu an mualah an chak zo lo ringawt.
Ningani zana inkhel dangah Italian club lian AS Roma pawhin beisei an phak lova, Jose Mourinho enkawl team hi FC Salzburg lakah si khat faiin an tlawm, an mualpho.
Sevilla an chak chiang
Team lian Barcelona leh Juventus ten hnehna an chan zawh loh laiin Europa League-a champion ngun ber Sevilla chuan chiang takin hnehna an chang ve thung a, La Liga club hian an khingpui PSV Eindhoven chu si thum fai ngawtin an hneh. Sevilla tan hian Youssef En-Nesyri, Lucas Ocampos leh Nemanja Gudelj ten goal an thun. Si thum fai ngawta an chak vangin last 16 lut turin an dinhmun a tha viau tawh a. second an khelh hunah Mimualah hnehna chan zui leh tumin thapui an thawh zui ang.