Manchester United in MasonMount an la lut

Nipui bazar inhawn mekah beisei anga che-tha lo Manchester United chuan hlawhtlinna an chang ve ta a, Chelsea atangin England mid-fielder Mason Mount an la lut fel.
Champions League khel tur United hian Mason Mount manah £55m an pe phawt a, an hnena a khelh that dan a zirin Chelsea hnenah £5m an pek belh leh ang. Mount hian Old Trafford-ah kum nga cham turin contract a ziak a, a duh a nih chuan kum khat dang a contract hi pawhsei leh theih a ni bawk ang. United hian Mount lak an tumnaah an hlawhtling mai lova, Chelsea in vawi thum ngawt an hnar vangin an beidawng hman hial. United an beidawn tawh laiin Mount hian United zawm a lo chak ve em em si a, indawr nawn lehin an inremna ta nge nge a ni.
Chelsea hian kum 24 mi Mount hi hralh an hreh viau a. Nipui bazar leh thlasik bazar liam taah player lei nan £600m zet an seng a. European competition an khelh phak bawk si loh vangin Financial Fair Play (FFP) an bawhchhiat a hlauh-awm bawk si a. Ui tak chungin Mount hi an hralh lo thei lo a ni ber mai.
Mason Mount chuan United chu khawvela club ropui ber pawl a nih vangin a zawm thei chu lawmawm a tih thu a sawi a. Chelsea-a a khelhpui thinte nen pawh United chungchang an sawi nasat thin thu a sawi tel bawk. “United in min duh tih ka hriat khan inngaihtuah buai lovin Old Trafford pan turin thutlukna ka siam thei nghal. Erik ten Hag hnuaia khelh a chakawm a, United kawr haa inlan ka nghakhlel tawh tak zet” tiin United tan inlan a chak tawh thu a sawi. Mount hian United Jersey roh em em; David Beckham leh Cristiano Ronaldo te pawhin an lo hak tawh thin No. 7 a ha dawn nghe nghe. Player tute pawhin Real Madrid leh Manchester United chu an zawm chak vek thu a sawi bawk. He a thu sawi hian titi a siam hat a, a bikin a club hlui Chelsea lamin an chai zui nasa hle.
United midfielder thar Mason Mount hian Chelsea academy chhuak niin Blues tan hian vawi 195 khelin goal 33 a thun a, Frank Lampard-a hnuaiah player pawimawh a ni. Season liam ta khan hliamin a tibuai nasa a, season tawp lamah club tan a inlan tam thei lo. England tan vawi 36 khelin, goal nga a thun tawh bawk. United hian an that pui ngei tura ngaih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More